"Оқ-тепа": Қарағанда жамоаси билан дуранг ўйнадик

Қўшни Қозоғистоннинг Қарағанда шаҳри жамоаси “Шахтёр”нинг ёшларига қарши “Оқ-тепа-2” майдонга чиқди.

Учрашувнинг биринчи бўлимида устунлик ёшларимиз томонида бўлди. Шунинг натижаси ўлароқ футболчиларимиз ҳисобни биринчи бўлимнинг ўзидаёқ очишди. Марказий ҳимоячи Дилшод Исоқулов ўнг бурчакдан етказиб берилган тўпни боши билан ажойиб тарзда дарвозага тўғирлаб қўйди. Шундан сўнг ҳам меҳмонлар дарвозаси бир неча марта ишғол этилиши мумкин эди, аммо устун ва тўсинлар қарағандаликларни голлардан қутқариб қолди.

Танаффусдан кейин майдондаги вазият тенглашди. Меҳмонлар устози таркибда амалга оширган ўзгаришлари сабабли “Шахтёр” ёшлари жонланишди ва ўйин якунланиши арафасида ҳисобни тенглаштиришди. Аммо қолганига иккала жамоанинг аъзолари кучи ва вақти етмади. Шу тариқа учрашув 1:1 ҳисобидаги дуранг билан якунланди.

Эслатиб ўтамиз, эртага жамоамиз навбатдаги назорат учрашувни “Пахтакор-2”га қарши ўтказади. Ўйин “Оқ-тепа” стадионида 12:00да старт олади. Мураббийлар штаби мазкур беллашувда жамоамизнинг асосий таркиб ўйинчиларини майдонга туширишни режалаштирган.

Назорат учрашуви
ОҚ-ТЕПА-2 – ШАХТЁР-2 (Қозоғистон) – 1:1 (1:0)
23 январь. Тошкент. “Оқ-тепа” стадиони.
“Оқ-тепа-2”: Ислом Ёқубов, Дилшод Исоқулов, Абдумавлон Турсунов, А.Мамедов, Шоҳруҳ Пирназаров, Илмиддин Маматбоқиев, Ш.Ҳикматов, Зокир Мирқосимов, Н.Асқаров, Санжар Каримов, Бекзод Идиев.
Захирадан тушганлар: И.Одилов, Аббос Холдоров, Орзу Раззоқов, А.Файзиев, Муҳаммадбобур Муҳаммадиев, Шоҳруҳ Аълохонов, Достон Розиқов.
Гол: Дилшод Исоқулов.