"Олтин тўп"нинг навбатдаги соҳиби - …

Дастлаб ушбу рўйхатдан жами 23 ижрочи жой олганди. Кейинчалик эса "Ballon-d'Or"га даъвогарлар сони учтагача қисқартирилди.

Криштиану Роналду, Франк Рибери ҳамда Лионел Месси. "Олтин тўп" учун кураш шу уч юлдуз ўртасида кечади. Ғолиб номи эса 13 январь куни Швейцариянинг Цюрих шаҳрида бўладиган тақдирлаш маросимида эълон қилинади.

НОМЗОДЛАР ЙИЛ ДАВОМИДА ҚАНДАЙ НАТИЖАЛАР КЎРСАТИШДИ?
Ушбу уч номзод ичида энг кўп совринни Франк Рибери қўлга киритди. Француз футболчиси ўтган йилда жамоаси билан биргаликда нақд 5та! совринга эга чиқди. Асосийси, ушбу титулларни ютиб олишда Рибери "Бавария"га жуда катта ёрдам берди. Франциялик футболчи учун жуда муваффақиятли ўтган йилнинг яна бир ажойиб шахсий соврин билан якунланиши эхтимоли юқори…

Лионел Месси учун 2013 йилни у қадар муваффақиятли ўтди, деб айтиш қийин. Боиси Лео Чемпионлар Лигасида бош совринга эга чиқа олмади. Қолаверса, Аргентиналик футбол юлдузи йил якунида кутилмаган жароҳат орттириб олди. Лекин барибир Месси йилнинг энг яхши футболчисини тақдирлаш маросимида иштирок этади. Чунки у йил давомида ўзининг нималарга қодир эканини қайта-қайта  намойиш этиб турди. У киритган бир-биридан чиройли голлар "Барса" юлдузининг "олтин тўп"га номзод футболчилар қаторидан жой олиши учун етарли бўлди. Совринга эга чиқиш учун унда ҳам имкониятлар етарли.

Португалиялик тўп афсунгари учун ортда қолган йил жамоавий совринларга бой бўлмади. "Реал Мадрид" етакчиси севимли клуби билан бирор бир йирик турнирда ғалаба қозона олгани йўқ. Шундай бўлса-да, Роналду 2013 йилда ҳам ўзининг ажойиб ўйини ва киритган қойилмақом голлари билан мухлисларини зериктириб қўймади. Португалия терма жамоасининг Жаҳон Чемпионатига йўлланмани қўлга киртишида ҳам Роналду асосий ишни амалга оширди. Шуни инобатга олган ҳолда, Криштианунинг иккинчи марта Жаҳондаги энг яхши футболчи деб тан олиниши эхтимоли ҳам йўқ эмас…

ЯНА ҚАНДАЙ НОМИНАЦИЯЛАР ЎЗ ҒОЛИБЛАРИНИ КУТМОҚДА?
ФИФА нинг йилнинг энг яхшиларини тақдирлаш маросимида "Олтин тўп"дан ташқари яна бир қатор номинациялар бўйича ғолиблар аниқланади: Йилнинг энг яхши мураббийи, Йилнинг энг яхши аёл футболчиси, Йилнинг энг яхши аёл мураббийи, ФИФА Фейр-плей соврини ҳамда Пушкаш соврини.

Бу сафар йилнинг энг яхши мураббийи бўлиш учун Юп Хайнкес, Юрген Клопп ва Сер Алекс Фергюссон номзодлари кўрсатилган. Клопп "Боруссия Д"ни Европадаги етакчи клублар қаторидан жой олишида катта ишни амалга оширган бўлса, Хайнкес қитъа миқиёсидаги ютиш мумкин бўлган барча совринларга эриша олди. Сер Алекс Фергюссон ҳақида эса ортиқча гапириш ноўрин. Ушбу мутахассиснинг кўп йиллар давомида футбол ривожи учун қўшган хиссаси беқиёсдир. Шуни инобатга олган ҳолда, бу совринни "МЮ"нинг собиқ устозига берилишини таҳмин қилиш мумкин…

Аёллар ўртасида энг яхши бўлиш учун эса қуйидаги учун номзод даъвогарлик қилишмоқда: Надине Ангерер, Марта ва Абби Вамбах. Бу борада омад кимга кулиб боқишини таҳмин қилиш ҳам қийин. Боиси Марта бу совринни 5 марта ўзи билан бирга олиб кетишга муваффақ бўлган. Лекин Бразилиялик даҳо футболчининг даври ўтиб бораётгани ва унга Ангерер ҳамда Вамбах сингари рақобатчилар пайдо бўлаётганига эътибор қаратадиган бўлсак, энди аёллар ичида "қиролича" ўзгаришига ҳам тайёр туришмиз зарур назаримизда…

Ушбу тақдирлаш маросимида ўзининг янги соҳиби номини билиб оладиган яна бир номинация - Ференц Пушкаш номи билан аталувчи "йилнинг энг чиройли голи"дир. Ушбу соврин учун баҳс юритаётган футболчиларга бир эътибор беринг: Златан Ибрагимович, Неманя Матич ва Неймар Жуниор. Демак, Златаннинг йилнинг энг яхши футболчисини тақдирлаш маросимида қатнашмайди, деганлар адашишган экан. Ҳа, у "олтин тўп" учун номзод эмас. Лекин ушбу маросимда иштирок этишнинг ўзи ҳам ҳар қандай футболчи учун улкан шараф…

Бизни бефарқ қолдирмайдиган яна бир соврин - "ФИФА Фейр-Плей"дир. Эсингизда бўлса, ўтган йили бу совринга Ўзбекистон Футбол Федерацияси лойиқ топилган эди. Бу сафар ушбу соврин кимга насиб этиши эса ҳозирча номаълум…

СОВРИН МЕССИДАН БОШҚАЛАРГА ҲАМ НАСИБ ЭТАРМИКАН?

Биласиз, ФИФА 2010 йилдан буён йилнинг энг яхши футболчисини аниқлашда Франс Футбол билан биргаликда иш юритиб келмоқда. "Йил футболчиси" ва "олтин тўп" совринлари бирлаштирилгандан сўнг ушбу титул фақат Лионел Мессига насиб этган, холос.

ЙИЛ    ҒОЛИБ         ИККИНЧИ     УЧИНЧИ
2010    Месси            Иниеста        Хави
2011    Месси            Роналду        Хави
2012    Месси            Роналду        Иниеста

Лекин Аргентиналик футболчининг бу йил ҳам ушбу совринга эга чиқиш имкониятлари унчалик юқори эмас. Боиси ФИФА консентрацияни сақлаш ва "олтин тўп"га бўлган мухлислар қизиқишини сўндириб қўймаслик учун ҳам бу совринни қаторасига бешинчи бор Мессига бермаса керак. Аммо…
Яна ким билади дейсиз?!
 
Бундай қарама-қарши фикрларни жуда кўп билдириш мумкин, азиз мухлислар! Нима бўлганда ҳам биз 2013 йилнинг энг яхши футболчиси номини оз фурсат ичида билиб оламиз. Ҳозирча эса кутишга мажбурмиз…

Зохиржон Акрамхонов тайёрлади