Олий лигани тарк этишга «тараддуд» кўраётган клублар

Бу йил омадсиз жамоаларнинг сони 5тага кўпайгани, олий лигадаги кучсиз клублар сонини ортиши билан баҳолаш мумкин.

Ҳозир хавфли зонанинг энг қуйи поғонасидан “Андижон”ўрин олган. Клуб ҳисобида 16 очко мавжуд. Ундан 2 очко кўп жамғарган «Қўқон-1912» ҳисобида 18 очко бор. Сўнгги турларни кўтарингки кайфиятда ўтказаётган «Обод»да эса 19 очко. Гарчанд «Навбаҳор» ва «Олмалиқ» ҳисобида 22 очко бўлса-да, уларнинг тақвими бошқаларга нисбатан осон эмас. Фақат тажриба эвазига Игорь Шквирин жамоаси захира очколарини кўпайтириб олиши мумкин.

Келинг, қолган 6та тур тақвимига назар соламиз.

«Олмалиқ»
1.   «Олмалиқ»- «БУНЁДКОР»(қолдирилган учрашув)
2.   «Машъал» – «Олмалиқ»
3.   «Олмалиқ» – «Шўртан»
4.   «Олмалиқ» – «Андижон»
5.   «Обод» – «Олмалиқ»
6.   «Олмалиқ»- «Пахтакор»
7.   «Қўқон-1912» – «Олмалиқ»

«Олмалиқ» мазкур учрашувларда камида 6 очко жамғариши керак бўлади. Ундан пастда турган рақиблар барибир барча ўйинларда ғалаба қозона олмайдилар. 6 очколик тафовутни ушлаш учун қўшимча 6 очко жамоани олий лигада олиб қолади. Агар бу очколар «Андижон» ва «Қўқон-1912» клублари билан бўлиб ўтадиган ўйинларда қўлга киритилса, уларнинг иши янада осонлашади. Жамоа учун тақвимни қийин томони шундаки, асосий рақиблар билан сафарда тўп тепади. Ўз майдонида эса чемпионлик сари курашишда давом этаётган «Бунёдкор» ва ҳали учинчи ўриндан умидини узмаган «Пахтакор»га қарши баҳс бор.

«НАВБАҲОР»
1.   «Навбаҳор» – «Бухоро»
2.   «Насаф» – «Навбаҳор»
3.   «Навбаҳор» – «Қизилқум»
4.   «Металлург» – «Навбаҳор»
5.   «Навбаҳор» – «Бунёдкор»
6.   «Андижон» – «Навбаҳор»

Энг қийин тақвим шубҳасиз «Навбаҳор»да. Жорий йил 1996 йилда қўлга киритилган чемпионликнинг 20 йиллигини муносиб нишонлаган клубдан мухлислар ўнталикка киришни кутгандилар. Афсуски, аввалига Рашид Ғофуров, кейин Александр Волков клубни тарк этишди. Равшан Бозоровга қолган жамоа бирон нарсани ўзгартира олмади. Аксинча, жамоанинг ўйинида сифат йўқолди. Клуб иккинчи даврада бирин-кетин йирик мағлубиятларга учрай бошлади. «Обод» (3:0) ва «Пахтакор» (1:5) билан бўлиб ўтган ўйинлардаги натижалар мухлисларга ёқмагани аниқ.

«Навбаҳор» тўртинчи ўрин учун курашаётган иккита клуб «Қизилқум»ва «Бухоро»ни ўз майдонида қабул қилади. Агар 29-турда ««Бунёдкор»нинг чемпионликка бўлган имконияти сақлаб қолинса, Наманганда «Навбаҳор» яна очкосиз қолишини тахмин қилиш мумкин. Сафардаги ўйинлар ундан-да қийин. Қаршида «Насаф», Бекободда «Металлург»ва сўнгги турда ҳаёт-мамот жанги, «Андижон» - «Навбаҳор». Айнан шу ўйин олий лигада ким қолишига ойдинлик киритиши ҳам мукин бўлади.

«Обод»
1.   «Сўғдиёна» – «Обод»
2.   «Обод» – «Машъал»
3.   «Шўртан» – «Обод»
4.   «Обод» – «Олмалиқ»
5.   «Обод» – «Андижон»
6.   «Пахтакор» – «Обод»

Биринчи даврани сўнгги поғонада якунлаган «Обод» учун кўплаб қийин ўйинлар ортда қолди деб айтса бўлади. Қуйи жамоалар ичида пойтахтликлар иккинчи даврада ҳозирча энг кўп очкони қўлга киритдилар - 11. «Обод»дан ўз майдонида бўлиб ўтадиган ўйинларда ғалаба талаб қилинади. Шунда жамоа аниқ олий лигада қолади. Сафарда эса «Шўртан»ва «Сўғдиёна». Агар солиштирсак, «Навбаҳор» ва «Андижон»нинг рақибларидан кўра очко олиши эҳтимоли мумкин бўлган клублардир.

«ҚЎҚОН-1912»
1.   «Локомотив» – «Қўқон-1912»
2.   «Қўқон-1912» – «Нефтчи»
3.   «Сўғдиёна» – «Қўқон-1912»
4.   «Қўқон-1912» – «Машъал»
5.   «Шўртан» – «Қўқон-1912»
6.   «Қўқон-1912» – «Олмалиқ»

Мазкур бешта клуб ичида «Обод» ва «Қўқон-1912» жамоалари иштирокидаги ўйинларда мазмун ҳам бор. «Обод»нинг ўйини аввалдан яхши эди, фақат йигитларнинг олий лигага мослашиши учун вақт кетди. Ҳасанов келгач эса «Қўқон-1912» умуман бошқача ўйнай бошлади. Кейинги иккита тур «Қўқон-1912»га осон бўлмайди. ««Локомотив»» энди очколар учун «тиш тирноғи» билан ёпишади. Сўнгги икки тур “темирйўлчилар” учун ўта оғир келди. Аллақачон режасини бажариб бўлган «Сўғдиёна» билан бўлиб ўтадиган ўйинда қўқонликлар очкодан умид қилсалар бўлади. Кейинги ўйин эса уйда «Машъал» билан. «Навбаҳор» ва «Олмалиқ»дан фарқли равишда «Қўқон-1912»га 6 очко камлик қилади. Водийликлар сўнгги 6та ўйинда камида 9 очкони қўлга киритишлари керак.

«АНДИЖОН»
1.   «Шўртан» – «Андижон»
2.   «Андижон» – «Металлург»
3.   «Олмалиқ» – «Андижон»
4.   «Андижон» – «Бунёдкор»
5.   «Обод» – «Андижон»
6.   «Андижон» – «Навбаҳор»

«Сўғдиёна» каби олдига қўйилган вазифани ортиғи билан уддалай олган «Шўртан» кейинги турда «Андижон»ни қабул қилади. «Андижон» учун сафарда очко олиш мумкин бўлган энг идеал рақиби «оқ бўрилар»дир. Агар Ориф Маматказин бир амаллаб кейинги икки турда очко ола билмаса, кейинги тўрт тур улар учун «Boxing Day»данда оғир бўлади. Ғалаба қозонмаса ўзи қийналиб қоладиган икки клуб «Олмалиқ»ва «Обод» мезбон ролида. 28-турда ҳам чемпионлик учун курашаётган «Бунёдкор» билан Тошкентдаги ўйин ва чемпионатнинг сўнгги турида водий дербиси, «Андижон» - «Навбаҳор».

Олий лигада фақатгина бир жамоа кучлилар сафини тарк этади. Бу ўринга аллақачон Самарқанднинг «Динамо»си бош номзод сифатида қуйи лига турнир жавдалининг юқори поғонасидан мустаҳкам жой эгаллаб бўлган. Олий лиганининг 15-жамоаси ҳамда биринчи лиганинг иккинчи жамоаси ўртасида бўлиб ўтадиган ўйинда шубҳасиз олий лига клуби фаворит. Ҳозирча бу ўринга «Цементчи» ва «Норин» жамоалари кураш олиб бораяптилар.

Европадан фарқли равишда бизда қуйи лигага омадсиз жамоалар эмас, кучсиз, иш режаси анча суст бўлган клублар тушиб кетади. Бу борада клубларимиз олдида қилинадиган ишлар жуда кўп. Бизнинг клубларга футболни чуқур тушунадиган, мухлислар кўнглини бир йиллик натижа билан эмас, пойдеворни тўғри қўйиб узоқ йиллар давомида хурсанд қиладиган раҳбарлар керак.

Нодирхўжа Юлдашев