"Олимпик" нима учун футболчиларни ортга қайтарди?

Жамоа таркибида бир қатор янги футболчилар кўрикдан ўтмоқда. Шунингдек, бошқа жамоаларга ўтиши кутилган айрим ўйинчилар ҳам ортига қайтган. Мазкур мавзу ва тайёргарлик ҳақида Тимур Кападзега юзландик. 

"Тайёргарликни декабрь ойида бошлаганмиз. 17 январь куни яна Анталияга кетамиз. Ҳаммаси режа асосида кетмоқда. Муҳими барча соғ-саломат. Табиий майдонлар йўқлиги учун асосий эътиборни жисмоний ҳолатимизни тиклашга қаратганмиз. Янги футболчиларни ҳам синовдан ўтказяпмиз. Ўзини кўрсатганларни олиб қоламиз",- дейди Кападзе. 

- Мавсум якунига етгач бир нечта футболчиларга таклифлар кўпайди. Уларнинг айримлари янги жамоаси сафига ҳам бориб қўшилди. Лекин нима учун ортга қайтарилди?

- Хориждан ҳам таклифлар бор эди. Четдан яхши таклиф бўлса, кўриб чиқамиз дедик. Лекин кетса ҳам февраль, март ойида йиғинларимизда назоратимда бўларди. Клублар, агентларга олдимизда мусобақа борлигини, йиғинларимиз кўплигини тушунтирдик. Барибир ёзгача тақвим тиғиз, терма жамоа билан кўп бўлишади. Раҳбарият билан бир қарорга келиб, футболчилар шу ерда тайёргарлик кўришини маъқул топдик. Ҳар бир футболчимизга таклифлар бўлаётгани 2-3 йилдаги ишимизнинг самараси. 

- Хориж жамоаларида ўйнаётган легионерларчи? Ўйин амалиёти бўлмаётганларни "Олимпик"да кўрамизми?

- Улар билан ҳам гаплашдим. Яхши жамоа бўлмаса, ёзгача биз билан бўлиши мумкинлигини айтдим. Ўйин амалиёти берадими ёки йўқ бу ҳам муҳим. Биринчидан легионерларнинг клуби билан шартномаси бор. Бу масалани ҳам кўриб чиқамиз.