"Олимпиадада атмосфера ўзгача. Ҳар хил спортчиларни кўрасиз, улардан кўп нарсани ўрганса бўлади" — Абдурауф Бўриев

"Олимпиададан сўнг "Пахтакор" йиғинига қўшилдим. Бизни мураббийлар ва футболчилар жуда илиқ қарши олишди. Бундан хурсандман. Иккинчи давра старт олди. Илк ўйинимиз "Насаф"га қарши кечади. Мақсадимиз – чемпионлик", – дея гап бошлади Бўриев.

- Ўзбекистон термаси тарихда илк бор Олимпиадада иштирок этиб қайтди. Олимпия ўйинлари қандай даражадаги мусобақа экан?

- Бу мусобақада илк бор иштирок этдик. Ўзига яраша ҳис-туйғулари бор турнир экан. Бу мусобақада кучсиз жамоанинг ўзи йўқ эди. Ҳамма жамоалар юқори даражада тайёргарлик кўриб келган. Менимча, ким охирги вазиятларидан унумли фойдаланган бўлса, ўша жамоа ғалаба қозонди. Олимпиадада яхши қатнашдик деб ўйлайман, фақат озгина омад етишмади. Вазиятларнинг сўнги паллаларида гол уришга қийналдик. 

Энди Худо хоҳласа, "Пахтакор" билан чемпион бўлиш ва терма билан ЖЧга йўл олиш ниятидамиз.

- Олимпиада барибир Жаҳон чемпионати ва Осиё Кубогидан фарқли ўтади. Ташкилий масалалар бўйича қандай фикрдасиз? Муаммо бўлмадими? 

- Ҳа, алоҳида шаҳарча қилинган. Ҳар хил спорт тури вакиллари бор эди. Футбол учун алоҳида 5 қаватли бино барпо қилинган. Футболчиларнинг ҳаммаси ўша ерда эди. Атмосфера ўзгача. Ҳар хил спортчиларни кўрасиз, кўп нарсани ўрганса бўлади. 

- Йил бошидан буён Олимпия терма жамоаси футболчилари деярли дам олишмади ва тикланиш жараёнига кам вақт бўлди. Ўзингизни қандай ҳис этяпсиз? Чарчоқ аломатлари йўқми?

- Қайтганимизда озгина қийинчилик бўлди. Тикланиш учун клуб 2 кунлик дам берди. Энди бу ерда тикланиш жараёнини давом эттиряпмиз. Профессионал футболчи албатта бу каби нарсаларга жиддий аҳамият қаратиши керак, акс ҳолда жароҳат орттириб олиши мумкин. Бу нарса ҳар бир футболчининг жисмоний ҳолатига боғлиқ бўлади.