ОКМК ОАВ вакиллари ва мухлисларни ҳисобот конференциясига таклиф этмоқда

Клуб тасарруфидаги барча жамоалар ўз соҳаларида юксак ютуқларга эришиб, мухлисларни мамнун этди. Жумладан, ОКМК ФКнинг асосий жамоаси муваффақиятли иштирок этган мусобақалар билан бир қаторда, U-21 жамоаси, футзал жамоаси, аёллар жамоаси (ОКМК-Women) ва футбол академияси ёшлари ҳам мавсум давомида ўз маҳоратларини намойиш қилди. Уларнинг қўлга киритган натижалари клубнинг келажакка бўлган ишончини янада мустаҳкамламоқда.

Шу муносабат билан, йил давомида қўлга киритилган муваффақиятларни таҳлил қилиш, жамоаларнинг эришган ютуқларини баҳолаш ҳамда келгуси мавсум учун режалар билан ўртоқлашиш мақсадида ҳисобот конференцияси ўтказилади. Ушбу тадбирда юқорида санаб ўтилган жамоаларнинг раҳбарлари, мураббийлари ва масъуллари иштирок этиб, ўзларининг ҳисоботлари билан чиқиш қилади.

Конференция эртага, 26 декабрь куни соат 15:00 да Олмалиқ шаҳридаги "Металлург" маданият саройининг катта залида бошланиши режалаштирилган. Унда жамоатчилик вакиллари, журналистлар ва мухлислар клуб фаолияти ҳақида тўлиқ маълумот олиш, шунингдек, ўзларини қизиқтирган саволларни бериш имкониятига эга бўладилар.

Очиқ мулоқот тарзида ўтадиган ушбу тадбирда клубнинг келажакдаги режаларига оид қизиқарли маълумотлар ҳам эълон қилиниши кутилмоқда. Шу сабабли барча ОАВ вакиллари, клубимизнинг содиқ мухлислари ва футбол ишқибозларини ушбу муҳим тадбирда иштирок этишга чорлаб қоламиз!

P.S. Конференция бошланиш вақтида ўзгаришлар юзага келадиган бўлса, бу ҳақда қўшимча маълумот берилади. Тадбирга оид янгиликларни клубнинг расмий саҳифалари орқали кузатиб боришингиз мумкин.