ОФК президенти ЎФФ раҳбариятини футзал бўйича Осиё чемпионатидаги 3-ўрин билан табриклади

Осиё Футбол Конфедерацияси президенти Салмон бин Иброҳим ал-Халифа футзал бўйича Ўзбекистон миллий терма жамоасини Вьетнамнинг Хошимин шаҳрида бўлиб ўтган Осиё чемпионатида 3-ўринни эгаллагани муносабати билан Ўзбекистон Футбол Федерацияси президенти Мираброр Усмонов номига табрик йўллади.

«Бутун Осиё футбол жамоаси номидан мен Ўзбекистон Футбол Федерациясини ушбу муваффақият билан табриклашни истардим», - дейди ал-Халифа.

ОФК президенти ўз табригида терма жамоани ушбу мусобақага тайёрлаган техник гуруҳга, уларнинг ўз ишларига сидқидилдан ёндашиб, тинимсиз меҳнат қилганликлари учун ҳам миннатдорлик билдирган.

«Сизнинг раҳбарлигингиз остида Ўзбекистон Футбол Федерацияси бундан кейин ҳам ривожланишда давом этиб, бутун Осиё футбол мухлисларини қувонтириш ва завқлантиришда давом этади», - дейилади ОФК президенти табригида.

Эслатиб ўтамиз, 30 апрель – 10 май кунлари Вьетнамнинг Хошимин шаҳри ареналаридан бўлиб ўтган футзал бўйича 13-Осиё чемпионати баҳсларида Баҳодир Аҳмедов қўл остидаги Ўзбекистон футзал терма жамоаси учинчи ўринни эгаллади.