ОФК Мельбурндаги шароитлардан мамнун бўлди

Биласиз, ушбу мусобақа бешта шаҳар - Сидней, Ньюкасл, Канберра, Брисбен ва Мельбурнда бўлиб ўтмоқда. Эртага Мельбурнда охирги учрашув ўтказилади. Унда Ўзбекистон чорак финал доирасида Жанубий Кореяга қарши баҳс олиб боради. Шундан сўнг қолган ўйинлар Сидней, Канберра ва Ньюкаслда давом эттирилади.



Сайтимиз орқали хабар қилганимиздек, бугун ўйинолди матбуот анжумани ўтказилди. Матбуот анжуманидан олдин эса залда кичик тадбир ташкил қилинди. Яъни, эртага Мельбурндаги охирги ўйин муносабати билан ОФК бу ердаги ташкилотчиларга ўз ташаккурини билдирди. Дастлаб ОФК генерал координатори Павел Лузанов сўз олиб, ОФК номидан "Мельбурн" стадиони маъмуриятига ўз миннатдорчилигини изҳор қилди, шунингдек бу ерда фаолият олиб бораётган волонтёрлар (кўнгиллилар)га катта раҳмат айтди.



Кейин эса махсус сертификатни стадион бош менежери Шейн Мэйтс ва волонтёрлар бошлиғи Даниэл Эндрюсга топширди. Қолаверса, ОФК матбуот хизмати вакиллари ҳам ташкилот томонидан тақдирланишди. Павел Лузанов ОФК стадиондаги шароитлар аъало даражада эканлигини ва ташкилотчилик ҳам зўр бўлганини айтиб ўтди. Эслатиб ўтамиз, Мельбурндаги асосий ўйингоҳда шу пайтгача Австралия - Қувайт, Эрон - Баҳрайн, КХДР - С.Арабистони, Фаластин - Иордания, Ўзбекистон - С.Арабистони, Япония - Иордания ўйинлари ўтказилди ва эртага Ўзбекистон - Жанубий Корея беллашуви бўлиб ўтади.