«ЎФА Кубоги» ташкилий қўмитасининг йиғилиши бўлиб ўтди

Мазкур меморандум асосида юртимиздаги Олий таълим муассасалари ўртасида футбол бўйича “Ўзбекистон футбол Ассоциацияси Кубоги” мусобақаларини ўтказиш Низоми тасдиқлан.

Бугун, ЎФА мажлислар залида ушбу мусобақа ташкилий қўмитасининг йиғилиши бўлиб ўтди. Унда ЎФА ва ЎзПФЛ ходимлари, ҳудудий федерация раҳбарлари, Олий ва махсус-ўрта таълим вазирлиги вакиллари иштирок этди.

Ўзбекистон футбол Ассоциацияси Бош котиби Сардор Рахматуллаев, Профессионал Футбол Лигаси Бош директори Омон Ғафуров мусобақанинг моҳияти, ташкил этиш ва ўтказиш қонун-қоидалари хусусида гапирар экан, мазкур мусобақани ўтказишдан кўзланган мақсад ёшларни маънавий бой ва жисмонан соғлом этиб тарбиялаш, уларнинг бўш вақтларини мазмунли ўтишини таъминлаш, ёшларни соғломлаштириш учун футбол ўйинларига жалб этиш, улар орасидан иқтидорлиларини танлаб олиб, турли терма жамоаларга тавсия этишдан иборат эканлигини таъкидлашди.

«ЎФА Кубоги» мусобақаси 3 босқичда ўтказилиб, якунда ғолиб аниқланади ва мусобақа ташкилотчилари томонидан тақдирланади. Мусобақанинг 1-босқичи шу йилнинг март ойида бошланиб, унда ҳудудларда жойлашган Олий ўқув юртлари футбол жамоалари уй-меҳмон тизимида баҳс олиб боришади.

2-босқич апрель ойида тўрт минтақада ташкиллаштирилади. Унга кўра Наманган шаҳрида Андижон, Фарғона ва Наманган вилоятлари бўйича 1-босқич ғолиблари ўзаро куч синашишса, қолган минтақалар қуйидагича тақсимланган: Самарқанда шаҳрида Сурхондарё, Қашқадарё, Навоий ва Самарқанд, Урганч шаҳрида Қорақалпоғистон Республикаси, Бухоро ва Хоразм, Тошкент шаҳрида эса Тошкент, Сирдарё, Жиззах вилоятлари ҳамда Тошкент шаҳри вакиллари кураш олиб боришади.

3-босқич - финал қисми май ойида пойтахтда ўтказилади. Табиийки, унда 2-босқич ғолиблари бош соврин учун майдонга тушишади.