ОЧЛ финали олдидан матбуот анжумани ташкил этилди

Кеча ўйиндан олдинги анъанавий матбуот анжумани ташкил қилинди. "Урава Редс" бош мураббийи Такафуми Хори саволларга жавоб қайтарар экан, биринчи финалдан олдин қуйидаги гапларни айтди:

- "ОЧЛ финалида "Ал Ҳилол"га қарши баҳс юритиш ажойиб бўлади. Чунки бу Осиёнинг энг кучли клубларидан бири. Мен жамоани қабул қилиб олаётганимда финалга қадар етиб келишимизни умуман ўйламагандим. Биз босқичма-босқич ўсиб бордик. Финалга чиқиш ўз-ўзидан бўлмайди. Бунинг учун катта меҳнат талаб қилинади".

- "Биз бу ерга келиш учун 9,600 км. масофани босиб ўтдик. Бекорга келмаганимизни исботлашга ҳаракат қиламиз. Саудия клублари жисмоний жиҳатдан кучли. "Ал Ҳилол" эса ўйин томонлама ҳам кучли. Биз Япониядан 200 кишидан кўп бўлиб келдик, ҳамма жамоамизни қўллаб туришга тайёр".

Матбуот анжуманида "Ал Ҳилол" бош мураббийи Рамон Диас ҳам иштирок этди. Мураббий муҳим беллашув олдидан шундай деди:

- "Бизда яхши ўйинчилар кўп ва шогирдларимга тўлиқ ишонаман. Масалан, жамоамиз сардори Осама Хавсави терма жамоада мунтазам ўйнаб келмоқда. "Ал Ҳилол" қийин вазиятларда қандай ўйнашни билади. Саудия Арабистонининг жаҳон чемпионатига чиққани кўплаб футболчиларга ижобий таъсир қилди. Улар энди клуб миқёсида ҳам нимагадир эришишмоқчи".

- "Биз ярим финални ажойиб тарзда ўтказиб, финалга қадар етиб келдик. Энди бош мақсад Кубокни қўлга киритиш. Рақибни ҳар томонлама ўрганиб чиқдик, "Урава" яхши клуб, лекин уларнинг ҳам ожиз томонлари бор. Ким хатога камроқ йўқ қўйса ўша Осиё чемпионлар лигасини ютади".