Нозим Муллаохунов: "Мақсадимиз ёшлардан иборат курашчан жамоа шакллантириш"

Яқинда жамоага бош мураббий этиб тайинланган маҳаллий мураббий Нозим Муллаохунов билан Андижонда учрашиб у кишидан интервью олдик.

- Жамоани қабул қилиб олганимга ҳеч қанча бўлмади. Шунга қарамай, тайёргарликни кучайтирдик. Кун-ора синов-назорат баҳсларини ташкил этиб, таркибни шакллантириб бормоқдамиз  дея гап бошлади Муллаохунов.  Ўзингизга яхши маълумки, бунгача "Андижон" ёшлар жамоасини бошқариб келаётгандим. Айтиш мумкинки, олий лига билан биринчи лигани ўртасида савия катта. Интизом бор жойда, натижа бўлади. Шу боис янги клубда аввало тартиб-интизомни биринчи ўринга қўйганмиз. Қўл остимиздаги йигитларнинг барчаси асосан маҳаллий ёшлардир. Шунингдек Футболга ихтисослаштирилган мактаб-интернати тарбияланувчиларига ҳам имконият беряпмиз.  Ҳозир уларнинг нималарга қодир эканлигини амалда  кўздан кечириб чиқмоқдамиз.

- Чемпионат стартига қадар футболчиларнинг жисмоний тайёргарлигига эътибор қаратган холда, бу борада жиддий ишлашимиз керак бўлади. Шунингдек синов-назорат ўйинлари орқали жамоавий ўйинни шакллантиришга ҳам алоҳида эътибор қаратмоқдамиз. Назаримда йигитлар ўйиндан-ўйинга бир-бирларини тушуниб бормоқда.

- Режага кўра 7 март куни Тошкентда футболчиларни Футбол-МЕД кўригидан ўтказамиз. Кейин эса 8-10-12 март кунлари ўртоқлик ўйинларида иштирок этишни ўйлаб турибмиз. Пойтахтда жами 3та ўйин ўтказиб, сўнгра Андижонга қайтамиз. Шундан сўнг тайёргарликни ўз қароргоҳимизда олиб борамиз.

- Бизга яратиб берилаётган шароитларга келадиган бўлсак, бу борада нолимаймиз. Клубимиз раҳбарияти имкон қадар шароитларни муҳайё этиб келмоқда. Фурсатдан фойдаланиб раҳбариятга бунинг учун миннатдорчилик билдириб қоламан.

- Жорий мавсум жамоамиз янгитдан шаклланаётган бўлишига қарамай, ўз олдимизга биринчи босқичда кучли саккизликка киришни мақсад қилиб қўйганмиз. Умид қиламанки бунга эриша оламиз.

Исломбек Рустамбеков суҳбатлашди.