Нўъмон Ҳасанов: "Аслида 5-6 ойда ўргатиладиган нарсани бир ойда ўргатдим"

"Узоқ масофа босиб келган мухлисларга раҳмат айтаман. Менимча бугунги ғалаба уларники бўлди. Про лига вакили "Оқ-тепа"нинг ўйини ёқди, қўрқмасдан бир-бирига пас ошириб ўйнашди. Биз ҳам шундай ўйнашни паслар билан ҳаракат қилишни яхши кўрамиз. Йигитларга раҳмат айтаман. Рақибдан устун келдик. Кўп вазиятлардан фойдалана олмадик. Шу бизнинг камчилигимиз бўлиб қолмоқда. "Оқ-тепа"га ҳам ташкилотчилик ва ажойиб майдон танлашгани учун миннатдорчилик билдираман. Кейинги ишларига муваффақиятлар тилайман. 

Кўраётган бўлсангиз кўп ўйинларда шундай вазиятлардан фойдалана олмаяпмиз. Ҳамма нарсани биттада ўргата олмайман. Улар ҳам футболчи, мен ҳам инсонман. Жамоа кўряпсизлар чиройли ўйнамоқда, прессинглар қилмоқда. Яна ўргатадиган нарсаларим бор. Секин аста мен истаган ўйин юзага келади. Аслида 5-6 ойда ўргатадиган нарсани бир ойда ўргатдим. Футболчиларнинг ақли ҳам бор, техникаси кучли. Шу боис тезда ўзлаштиришмоқда. 

Азим Аҳмедовни жамоага келганимдан бери марказий ҳимояда ўйнатмоқдаман. Биринчи бор 2013 йил жамоага келганимда ҳам ўшанда Азимни марказий ҳимоядаги ўйинини кўргандим, жамоани Суперлигада олиб қолгандик. Ҳозирги вақтда жамоа бошқарувимга ўтганимдан сўнг биринчи ўйинданоқ уни мудофаа чизиғига ўтказдим. 

Бу кубок мусобақаси. "Оқ-тепа"нинг "Хоразм" ва "Турон" билан ўйинларини кўриб ўрганиб чиқдик. Улар яхши ўйин ўтказмоқда. Биз бугун прессинг қўллаб рақибга имконият бермадик",- дейди Нўъмон Ҳасанов.