Никола Лазаревич: "Бугунги ўйинда футболчиларимнинг ҳаракатларидан кўнглим тўлди"

Ўйин ҳақида

- "Қўқон-1912" жамоасини ғалаба билан табриклайман. Биз "Пахтакор" билан ўйиндан сўнг қисқа фурсат ичида ушбу учрашувга тайёргарлик кўрдик. Олдимизда осон бўлмаган ўйинлар кутиб турибди. Шу боис ўйин амалиёти кам бўлган футболчиларга ҳам имконият беришга ҳаракат қилдик. Бугунги ўйин учун йигитлардан ҳафа эмасман, ҳаракатларимиздан кўнглим тўлди.

- Бугун жамоангиз таркибида асосан ёш футболчилар ҳаракат қилишди. Ушбу ёш футболчилардан қайсиларини асосий таркиб учун номзод сифатида кўрмоқдасиз?

- Ҳа, улар орасидан тайёр бўлиб келаётганлари бор. Бугун уларни кўриб олишимиз учун яхши имконият бўлди. Ўйинни такроран кўриб чиқиб таҳлил қиламиз. Ёш футболчилар орасида асосий таркибга лойиқ бўлганлари бор.

- Сиз каби мураббийлар ўзбек футболида ишлаб келишмоқда. Масалан бунга Иван Бошковични мисол келтириш мумкин. Шу каби ўзбек футболини яхши билган Драган Черан, Люпче Дориев каби футболчилар ҳам бор. Бу борада фикрингиз қандай?

- Ҳа, ўзбек футболида хорижий мутахассислар бор. Иван Бошкович ҳам жуда яхши ишлаб келаяпти. Жиддий чемпионат, даражаси етакчи лигалардан кам эмас. Славян футболчиларга ҳам бу чемпионатда осон бўлаётгани йўқ. Мен уларга ишонаман. Ўзбекистон миллий терма жамоаси жаҳон чемпионатига чиқишга яқин турибди. Ушбу воқелик юз берса, ўзбек футболининг даражаси янада ортади.

- Иссиқ об-ҳаво шароитида футбол ўйнадингизлар. Учрашувнинг эрта вақтда бошланганига фикрингиз қандай?

- Бу борада ташкилотчилар ўйлагани аниқ. Бу борада менда савол йўқ. Иссиқ об-ҳавода футбол ўйнаш осон эмас, бироқ бунинг ҳам ўзига яраша сабаблари бор экани аниқ. Биз узоқ йўл босиб келдик, эҳтимол об-ҳаво ҳам ўйин сифатига таъсир кўрсатгандир.