Неймар сўнгги 6 йилда илк маротаба карнавални ўтказиб юборади. У хатто синглисининг туғилган кунига ҳам бормаса керак

Бу сафар карнавалда Неймар иштирок этмайди. Бу саналарда футболчи дисквалификация ёки жароҳат олиб Бразилияга учиб кетишига ҳамма ўргани қолган эди. Аммо бу сафар ҳаммаси бошқача. Бразилиялик "Инстаграм"да эфирга чиқиб, ПСЖ мухлисларини тинчлантирди: "Катта мамнуният билан шуни айтмоқчиманки, бу йил Бразилиядаги карнавални ўтказиб юбораман. Бу сафар мунозаралар бўлмайди. Рахмат. Карнавални яхши ўтказинг!".

Неймар ғазабда

Ҳаммаси "Барселона"да бошланган: 2015 ва 2016 йилларда футболчи дисквалификация олиб, ватанига учиб кетган. Кейинги уч йилда жароҳат олди. Аммо бу сафар эмас.

Тез орада Париж клуби иккита муҳим баҳс ўтказади - "Лион"га қарши Франция Кубоги ярим финали ва Чемпионлар лигаси 1/8 финал жавоб учрашувида Дортмунднинг "Боруссия" клубига қарши баҳс. Биринчи ўйинда немис клуби (2:1) ғалабага эришди. Бу учрашувдан олдин Неймар соғлигидаги муаммолар туфайли 4та ўйинни ўтказиб юборди.

Бу вақт ичида у Германиядаги модалар кўргазмасида иштирок этди. Франция матбуотининг ёзишича, ПСЖ раҳбарияти бразилияликнинг бу ишидан норози бўлган экан. "Боруссия"га қарши учрашувдан сўнг Неймар ўз клубини очиқчасига танқид қилди: "Тўртта ўйинни ўтказиб юбориш қийин. Афсуски, бу менинг танловим эмас. Клуб ҳамда шифокорлар шунга қарор қилишди ва бу қарор менга ёқмади. Ушбу мавзуда кўплаб баҳс-мунозаралар бўлди, чунки мен майдонга тушишни истагандим. Ўзимни яхши ҳис қилаётган эдим, бироқ клуб қўрқди. Якунда энг кўп азият чеккан мен бўлдим. Клуб қарорини ҳурмат қиламан, аммо футболчи жабр-дийда бўлиши нотўғри".

Бу йил Неймар синглисининг туғилган куни "Боруссия"га қарши ЧЛ жавоб ўйинига тўғри келади ва бразилиялик уйига кета олмайди. Футболчи синглисининг туғилган кунини худди Бразилия карнавали каби 6 йилдан бери ўтказиб юбормаган эди, балки ғазаб шунга боғлиқдир.