"Нефтчи" мухлислари жамоанинг айни дамдаги ҳолати бўйича қандай фикрда?

Сайтимиз мухбири мазкур учрашувдан сўнг бир неча йиллардан буён Фарғона жамоасига мухлислик қилиб келаётган фаол мухлислар билан интервью ташкил этди.

Гарчи сўнги кунларда юз берган воқеъликлар фарғоналик мухлисларни ранжитган бўлса ҳам, улар "Нефтчи"нинг эртанги кунига, аввалги каби шонли даврларига қайтишига ишонишмоқда. Биз билан суҳбатда "Нефтчи" фан клуби раиси Алишер Турсунов, фахрий мухлис Козимбек Исмоилов, шунингдек клубнинг ашаддий ва энг таниқли мухлисларидан Иқболжон Турсуновлар иштирок этишди. Қуйидаги жонкуяр мухлисларнинг фикрларига қулоқ тутамиз.

Алишер Турсунов, фан клуб раиси: "Футболга бўлган қизиқишим 5 ёшдан бошланган. Ўшанда дадам қўлимдан етаклаб "Нефтчи" ва "Атласчи" жамоаларининг ўйинларига олиб борар эдилар. Биласизми, "Нефтчи" биринчи навбатда Юрий Саркисянни жамоага қайтариб розилигини олиши керак. У кишини тажрибалари асосида клуб академиясини ривожлантириш зарур ва бугунги куннинг талаби. Ўз вақтида футболчи етиштириш бўйича "Нефтчи" Ўзбекистонда тенгсиз ҳисобланарди. Клуб академиясида ҳозирги "Насаф" каби ҳар йили 3-4 та таниқли ўйинчи порлаб чиқарди. Ҳозирда бизга жамоада фидоий футболчилар камдек кўринмоқда. Баъзи футболчилар бир йиллик шартнома тузади, ўхшаса ўхшади, ўхшамаса кейинги мавсумда бошқа жойда пайдо бўлади. "Нефтчи" учун борини берган Андрей Фёдоров, Акмал Холматов, Анвар Бердиев, Мансур Саидов каби фидойи футболчилар ҳозир бизга етишмаяпти.

ПРО-Лигадаги сўнги ўйинлар ҳақида айтадиган бўлсам, "Динамо" билан баҳсда футболчилар негадир рақибга тўғри баҳо бера олишмади. Улар бу ўйиндан олдиноқ ғалаба қозонишларига ишониб қолишди, якунда бу панд берди. “Турон" билан бўлиб ўтган учрашувда жамоа дурангни кўзлаб майдонга тушгандек кўринди. Биласизми, бу ўйинда "Турон"ни йўқотадиган ҳеч нарсаси йўқ эди. Бундан ташқари жамоамизда тактик жиҳатдан хатоликлар ҳам бўлди. "Андижон" билан ўйин ҳақида айтсам, бу учрашувда "Нефтчи"нинг асосий таркиб футболчилари Достонбек Тошматов, Жамшид Қобулов, Шерзод Абдураимовларнинг ўрни яққол билинди. Бу ҳам етмагандек тезкор ярим ҳимоячи Рустам Абдуҳамидовнинг машғулот вақтида олган жароҳати ўйин вақтида ўз таъсирини кўрсатди. Унинг ўрнига тушган Павел Смоляченконинг ўйини чиқмади, аслида Абдуҳамидовнинг ўрнига Исломбек Каримовни қўйиш тўғрироқ бўларди назаримда.

Биз руҳиятни туширмаймиз, "Нефтчи"нинг ғалабали кунлари ҳали олдинда. Айни дамда вилоятимиз ҳокими Хайрулло Бозоровнинг жамоага бўлган эътибори юқори. Ўйлаймизки, вилоятимиз раҳбари "Нефтчи"ни яна аввалги даражасига қайтаради".

Козимбек Исмоилов, фахрий мухлис: "Бу йил ҳамма соҳаларда бўлганидек футболимиз ҳам пандемия туфайли кутилмаган қийинчиликларга дуч келди. Шундай бўлсада, Чемпионатни якунлай олганимиз тақсинга сазовор. Албатта ПРО лига ҳам муваффақиятли ўтган дея оламиз. Биз “Нефтчи “ мухлисларининг жорий мавсумда ниятлари , орзулари жуда катта эди.Умумий маънода олганда жамоа учун мавсум муваффақиятли ўтган десак бўлаверади. Биринчи босқични биринчи ўринда якунлади, оҳирги уч тур олдидан яқин тақибчисини беш очкога ортда қолдираётган эди. Афсуски, сунги турларда воқеалар кескин тарзда ўзгариб кетди, супер лига йўлланмаси учун зарур бўлган биргина очкони қўлга кирита олмадик. Ҳаммаси “Нефтчи” нинг қўлида эди, бунинг устига вилоят раҳбарининг жамоани олдинги мавқейини тиклаш ҳақидаги фикрлари футболчиларимизга қўшимча мотивация бериши кутилган вазиятда жамоадаги руҳий барқарорликни етишмаслиги, жисмоний толиқиш, ғалабага бўлган ишончни етишмаслиги панд бериб қўйди.

Шу ўринда мусобақа ташкилотчиларига баъзи эътирозларимизни билдириб ўтсак. Мусобақани икки даврали, уй –сафар тизимида ўтказилиши мақсадга муофиқ бўлар эди. Вақтнинг қисқалиги, ўйинларни уч кунда ўтказилиши футболчиларни жисмоний толиқишига олиб келганлигини гувоҳи бўлдик. Айниқса “Нефтчи” учун энг кераки бўлган “Динамо” га қарши баҳс билан “Шўртан” га қарши қийин ўтган ўйин орасида икки кунгина ўтди ҳолос. Йил ўйини деб таърифланган “Турон”га қарши ўйинда эса вилоят бош жамоаси таркибида футболчилар ўйнамади, майдонда руҳан толиққан умидсизликка тушган футболчиларни сийрати кўринди ҳолос. Бу борада ташкилотчилардан доимий ва ишончли регламент бўйича иш кўришларини сўраб қолардик.
Шунингдек, супер ва ПРО лига вакилларини ўтиш ўйини ҳам фақат расмиятчилик деб ҳисоблайман ва чемпионатларимиз тариҳида ҳеч бир ПРО лига вакили элита жамоасидан устун бўла олмаган, “Нефтчи”нинг сўнги ўйиндаги мағлубиятни ҳам табиий ҳол деб ҳисоблайман.
“Нефтчи” супер лига йўлланмасини қўлга кирита олмаган бўлсада биз мухлисларни кўнглимиз тўқ. Вилоят раҳбарлигига футболни жонкуярларидан бўлган Хайрулло Хайитбоевич келди. Дастлабки кунларданоқ футболга, “Нефтчи” га эътиборини қаратди. Албатта тез кунларда жамоада сезиларли ижобий ўзгаришлар бўлишига ишонамиз, ўша биз севган “Нефтчи” яна қайтади. Бу сафар шунчаки эмас, янги тарих ёзиш учун, ўзбек футболида, Осиё футболида ўз сўзини айта олиш учун қайтади. Фарғона кўчаларида байрам яқин."

Абдувоҳид Жўраев, фахрий мухлис: "Мана бу мавсумни хам якунлаб олдик, айниқса бу мавсумнинг якуний кисми, интригаларга, тўқнашувларга бой бўлди.Бу йил чемпионатимиз савияси озми кўпми кутарилгандай бўлди, хусусан ПРО-Лигага бўлган эътибор кучайди. Бунга севимли жамоамиз Нефтчининг интриганинг охирги тургача давом эттириши сабабчи булганидир. Лекин сўнгги турдаги кўнгилсизликлар сабаб "Нефтчи" шаънига отилаётган тошларни куриб тўғриси ажабландим. Наҳотки бизни бошка вилоятлардаги мухлислар бизни Ёуперлигада куришни шунчалик хохлашмаса?
Ахир бунақа холат хар кандай жамоа билан юз бериши мумкинку, агар сизнинг жамоангиз шундай холатга тушса нима килардингиз? Тўғри футболчиларимиз кизиққонлик килганди. Жамоа ва унинг мухлислари ўзларининг ёғига ўзлари қовурилиб ётган бир пайтда Нефтчини чемпионатдан хайдашни сўраш тўғримикан?
"Оққан дарё оқаверади"деган мақол бор, эртадан кейин буюк тарихга эга бўлган "Нефтчи" яна ўзини кўрсатишни бошласа уялиб қолмайсизлармикан? Мен бу билан жамоамиз азоларини, клуб маъмуриятини, футболчилар ва мухлисларни оқлашдан йироқман. Албатта футболчилар ва айрим мухлислар томонидан ўша куни содир қилинган ишлар тўғри эмас.

Лекин ўйлаб ўйимга етолмайман, футбол ичида сизу биз тушунмайдиган шунака жумбоқлар бўларканки, ўзимга савол бериб ҳалиям жавоб олалмаяпман. Наҳотки чемпионат якунига 2 тур қолганида 5 очко олдинда кетаётган жамоа боз устига сўнги 2 турни ўз майдонида ўтказса, яна атиги 1 очко,сўнги ўйинда Туронни ўз майдонида 2 тўп фарки билан ютсаю, ўз майдонида,мухлислари кўз олдида мағлуб бўлса?
Балки бу ўйиндаги мағлубиятга нотўғри тактика танлангандир,балким ўйинчиларимизга етарлича мотивация берилмагандир, билмадим яна биз билмаган бошка сабаблари бордир.

Бизнинг футболчилар ва мухлислар етарлича жазо олишди. Илтимос, энди улар ҳақида ёмон гаплар ёзишни тўхтатинглар. Бу кўнгилсизлик шу ўйиннинг келиб чикишидан пайдо булгани йўқ, бу нарса анчадан буён футболимиз ичидаги коррупция,хакамларимизнинг учрашувларни нохолис бошқаришидан шу нарсаларни кўриб барчаси шу ўйинга келганда портлади.Худо хохласа Нефтчимиз янги мураббий кул остида янги мавсумга тайёргарликни бошлайди. Янги мавсумда мухлислари севиб ардоқлайдиган, ўйинларидан барча бирдек роҳатланадиган Нефтчини кўрасизлар, биз бунга ишонамиз.

Иқболжон Турсунов, фаол мухлис: "Нефтчи"нинг қуйи лигаларда юришига сабаб Юрий Саркисяннинг жамоада эмаслиги деб ўйлайман. Жамоада унинг ўрни бошқача эди, у киши кетганидан сўнг клубга бўлган эътибор пасайиб кетди.

"Турон" билан бўлган баҳсда "Нефтчи"га ғалаба ёки дуранг зарур эди. Якунда эса ҳаммаси бошқача бўлди, биз мағлуб бўлдик. Ўйин ҳарорати сабаб ўзимизни тўхтата олмай майдонга тушиб кетдик. Биз бу кунларни "Нефтчи"нинг ашаддий мухлислари билан икки йил кутдик. Шахсий фикримча, ўйиннни бошқариб борган ҳакам бир оз хатоликларга йўл қўйди. Албатта, майдонга тушишимиз нотўғри бўлди, бундан тегишлича хулоса чиқардик.

Вилоятимиз ҳокими Хайрулло Бозоровга фарғоналик мухлислар номидан миннатдорчилик билдирамиз. Ўйлайманки, у киши "Нефтчи"ни аввалги мавқеъига қайтаради.

Бекзод Толибов ёзиб олди