"Navruz Cup-2022". Бунақаси фақат бизда бўлса керак...

Учинчи ўрин учун баҳсда Тожикистон ва Қирғиз Республикаси тўқнаш келса, финалда Ўзбекистон терма жамоаси Угандага қарши майдонга тушади. 

"Навбаҳор" футбол клуби телеграмдаги расмий каналида кеча 21:40да чипталари тўғрисида пост эълон қилинди. 

"... 29 март куни бўлиб ўтадиган ўйинлари учун чипталар нархи мухлисларга қулайлик яратиш мақсадида арзонлаштирилди. Эртадан сотувга чиқадиган чипталар нархи барча секторларга 20 000 сўм этиб белгиланди. Асосийси битта чипта харид қилиб, 29 март кунги 2 та ўйин, яъни, Тожикистон – Қирғиз Республикаси ҳамда Ўзбекистон – Уганда терма жамоалари ўртасидаги учрашувларни бевосита стадионда томоша қилиш имкониятига эга бўласиз..." дейилади постда. 

Ушбу хабарни кўрган заҳоти хаёлга бир савол келди, финал чиптаси ярим финалникидан арзонроқ-ми? Шахсан мен ҳали бирор мусобақада ярим финал чиптаси финалникидан қимматроқ бўлганини кўрмаганман. Бунақаси фақат бизда бўлса керак. 

Тўғри, бу ишнинг сабаби мухлисларга қулайлик яратиш, дейиш мумкин, аммо... Агар 30 минг сўм (ярим финал ўйинлари учун чипта нархи) томошабин учун қиммат бўлса, нега бундай нарх белгиланганди? Балки мутасаддилар терма жамоамиз биз ҳаммамиз кутган дарадажадаги ўйин намойиш этиб бера олмагани учун, бу сафар ярим финалга келганларнинг ҳам бир қисми келмаслигидан хавфсираб, нархни туширишдими? Ёки стадион ҳаттоки Наманганда ҳам тўлмай қолганини кўргач, финалга кўпроқ томошабин келиши учун шундай йўл тутишдими? Ҳар икки вариантда ҳам яна янги саволлар пайдо бўлади. Агар сиз бирор бир мусобақада финал чиптаси ярим финалникидан арзон бўлганини билсангиз, айтиб, эслатиб юборинг.

Бу ерда асосий муаммо чипта нархи 30 ёки 20 минг сўмлигида ҳам эмас. Аслини олганда, фонограммада қўшиқ "куйлаб" берадиган баъзи қўшиқчиларимизнинг концертига 50, 100, 200 ва ундан қимматроққа ҳам чипта сотиб олиб кирадиган замонда, йилда саноқли ўйин ўтказадиган мамлакат терма жамоаси ўйинига ҳозиргидан қимматроққа билет олсак ҳам арзийди. Таъкидлаб ўтаман, биз ҳозир асло чипта нархи қиммат демоқчи эмасмиз. Шунчаки ярим финал чиптаси нархини финалникидан қиммат қилиб белгилаган инсонларга юзланмоқчимиз? Бундай ҳаракатни қандай изоҳлаш мумкин? 

Омонжон Тўхтамирзаев