"Навбаҳор": Шихов ва Мамадалиев билан шартнома тузилди

Ўтган мавсумни “Динамо”да ўтказган Санъат Шихов, Азамат Бобожонов ва “Металлург” клуби шарафини ҳимоя қилиб келган Суннатилла Мамадалиевлар билан бугун шартнома имзоланди. Молдовалик ҳужумчи Вадим Чемиртан эса мураббийларда илиқ таассурот қолдирмади. Шу сабабли Чемиртанга жавоб беришга қарор қилинди.

Режага кўра футболчиларимиз бугун, “Бухоро”га қарши навбатдаги назорат ўйинида майдонга тушишди. Бухороликларга қарши баҳсда мураббийларимиз асосан бир кун олдин ўтказилган учрашувда иштирок этмаган ўйинчиларга имкон беришди. 90 дақиқалик баҳс давомида жамоамизнинг кичик устунлиги кўзга ташланди. Гол уриш учун бир қатор имкониятлар ҳам юзага келтирилган бўлсада, якунда ҳисоб очилмади. Учрашувда жамоамиз таркиби қўйидагича бўлди: Дониёр Усмонов (Достон Тўхтабоев), Бобир Акбаров, Омон-Биик Ҳалилов, Ботир Тўрабоев, Аъзам Алиев (Раҳматилло Бердимуродов), Раҳматилло Мелибоев (Дилшод Жабборов), Роббим Ҳасанов (Азамат Бобожонов), Суннатилла Мамадалиев (Сардор Теляков), Муҳаммад Расулов, Илҳом Бойдедаев (Ғайрат Жўраев), Отабек Валижонов (Шахбоз Эркинов).

Жамоамиз эртага ПФЛ кубоги гуруҳ босқичидаги сўнгги учрашувда “Локомотив”га қарши майдонга тушади. 15 феврал санасида эса футболчиларимиз навбатдаги йиғиндаги сўнгги ўйинда иштирок этишади. Навбатдаги назорат учрашувида Самарқанднинг “Динамо” клуби билан куч синашилади.