"Навбаҳор": Санжар Асқаралиев келди, Мамазулумов кетди

Кеча бир маҳаллик машғулот билан чекланган футболчиларимиз бугун икки маҳал шуғулланишди. Машғулотлар давомида асосий урғу футболчиларнинг жисмоний ҳолатини яхшилашга қаратилган машқларга берилмоқда. Шу ўринда таркибда ҳам бир қатор ўзгаришлар рўй берганлигини айтиб ўтиш жоиз. Бугунги машғулотларга жамоа сардори Дилшод Жабборов қўшилди. Ўтган мавсумни “Андижон”да ўтказган наманганлик ярим ҳимоячи Санжар Асқаралиев ҳам жамоамиз йиғинига қўшилди. 2015 йилги чемпионат иккинчи ярмини “Металлург”да ўтказган маҳаллий футболчи Акбаршо Рашидханов ҳам айни пайтда жамоамиз билан бирга шуғулланмоқда. Бундан ташқари, олдинги мавсумни Уйчининг “Хотира-79” жамоасида ўтказган Жамол Абдужабборов, Мирзоҳид Собиров, Ботир Каримжоновлар билан биргаликда Билол Шарофиддинов, Ислом Жўраев каби футболчилар ҳам кўрикдан ўтишмоқда. Дастлабки кунги машғулотда қатнашган Сардор Асқаров машғулотларда иштирок этмади. Шунингдек, ҳужумчи Мўйдин Мамазулумов ҳам жамоа сафида кўриниш бермади.