Наманган шаҳри ҳокими "Навбаҳор"нинг келажагини ёшлар билан қурмоқчи

13 июль куни "Навбаҳор" клубининг раҳбарлари ва футболчилари ўртасида ҳокимиятда йиғилиш бўлди. Унда Шавкатжон Абдураззоқов клубнинг янги президенти сифатида таништирилди. Мураббий ва футболчилар билан суҳбатдан сўнг клуб президенти куни кеча янги режасини тадбиқ этди.

Унга кўра, бир неча йиллардан бери асосий таркибнинг соясида беэътибор қолиб келаётган "Навбаҳор" клубининг ўринбосарларига янги база тақдим этилди. Энди наманганлик ёшлар Тошбулоқдаги стадиондан база сифатида фойдаланадилар. Шу кунгача "Навбаҳор" ўринбосарлари дуч келган майдонда шуғулланиб юргандилар. Энди асосий таркибдан ташқари жамоанинг ўринбосарлари ҳам назоратда бўлишади.

Ундан ташқари жамоа ўринбосарларининг бюджети алоҳида бўлади. Асосий таркибнинг натижаларидан қатъий назар ўринбосарлар қийналмай ўз ишида давом этади. Ўринбосарлар жамоасининг ўз мураббийлар штаби ва бошқарувчи-менежери бўлади. Бу лойиҳани амалга оширишдан мақсад, яқин йиллар ичида "Навбаҳор"нинг асосий таркибига яхши футболчиларни тарбиялаб бериш ва йўқолиб бораётган ишончни қайтариш. Бугунги кунда "Навбаҳор" ўринбосарлари 16 жамоа ичида, 16-ўринни банд этиб турибди.

Мазкур лойиҳани, Наманганда фаолият бошлаётган Одил Аҳмедов академияси билан чамбарчас боғласа, иш сифати янада сифатли бўлишини айтиш мумкин.

Клуб президентининг бошлаган хайрли ишига омад тилаймиз!