Музаффар Музаффаров: “Мен учун “Сўғдиёна”ни олий лигада қолиши ҳамма нарсадан муҳим”

Олмалиқ шаҳрида “Оқ-тепа”га қарши кечадиган баҳсга “Сўғдиёна” футболчилари ҳар томонлама тайёргарлик кўришганини таъкидлашмоқда. Хусусан жамоанинг етакчиларидан бири бўлган Музаффар Музаффаров бўлажак баҳс олдидан қуйидагиларни айтди.

- “Бухоро”га қарши учрашувга жиддий тайёргарлик кўргандик. Рақибнинг “Нефтчи”га қарши ўтказган ўйинининг дискини кўриб, ўрганиб чиққандик.  Сабаби ўз уйимиздаги сўнгги баҳсда ғалаба қозониб, мухлисларимизни қувонтирган холда олий лигада ўз ўрнимизни сақлаб қолиш асосий мақсадларимиздан бири эди. Афсуски дастлабки 10 дақиқада дарвозамиздан тезкор голларни ўтказиб юборганимиз, ҳаммасини ўзгартириб юборди. Акс холда ўйин сурати умуман бошқача кечиши ҳам ҳеч гап эмасди. Бундай пайтда истайсизми йўқми тезкор гол футболчини руҳан “синдириб” қўяди. Аммо шунга қарамай биз ғалаба илинжида астойдил охиригача харакат қилдик.   

- Энди ўтган учрашувдаги омадсизликларни унутган холда, бор эътиборимизни плей-оффга қаратганмиз. Бош мураббий Даврон ака Файзиев руҳий жиҳатдан тайёрлашга уринмоқда. Бунинг учун у кишига раҳмат. “Оқ-тепа”га қарши учрвашувда боримизни беришга тайёрмиз.  

- Плей-оффдаги рақибимизнинг ҳам ўйини туширилган видео тасвирларни ҳам кўриб, ўрганиб чиқдик. Ўйлайманки биз керакли натижани қўлга киритамиз.

- “Оқ-тепа” ҳақида нима дейиш мумкин? Рақибнинг кучли томонлари шуки таркибда илгари олий лигада харакат қилган ўйинчилар жамланган. Аксинча холатлари эса фикр билдира олмайман. Бу билан уларни менсимасликка кириб қолмасин. Юқорида айтганимдек ҳар қандай холатда ҳам биз ютуқ учун майдонга тушамиз. Ўйлайманки бунга имкониятимиз етарли.

- Жамоада ички муҳит аъло даражада. Молиявий шароитларга келадиган бўлсак, ўтган йилгига нисбатан яхши дейиш мумкин. Биласизми шахсан мен учун “Сўғдиёна”ни олий лигада қолиши ҳаммасидан муҳим. Қолгани кейинги даражали.

- Майдонда кўпроқ Санжар Рашидов билан бир-биримизни яхши тушуниб харакат қиламиз. У билан ўйнаш менга ҳам осон.

Исломбек Рустамбеков суҳбатлашди.