Мухлис хотирасидан: "Пахтакор" - "Динамо" (Киев) 5:0
27 jan 2016 15:51
News
![](https://championat.asia/upload/storage/196560_original.jpg)
![](/upload/storage/196560_220.jpg)
Мухлис хотирасидан: "Пахтакор" - "Динамо" (Киев) 5:0
Кўпчилик ёши катта футбол мухлислари ўша йилда бўлиб ўтган «Пахтакор» - «Динамо» (киев) ўртасидаги собиқ СССР чемпионатинг иккита ўйинни эслаб юришади. Айниқса Тошкентда бўлиб ўтган ўйиндаги 5:0 ҳисоби «Пахтакор» тарихи зарварақларидан энг юқори ўрин эганланланлиги шубҳасиздир. Айнан шу ўйин тафсилотлари менинг ҳам хотирамда, қувончли бир кундек сақланиб келади. Ўша йили Киев «Динамо»чилари Европа суперкубогини қўлга киритиб бутун дунёда шов-шув кўтарган эди. Финалда кимсан «Бавария»ни мағлубиятга учратиб, Тошкентга ташриф буюрган эди. «Пахтакор» стадиони мухлислар билан лиқ тўлган ва яна қанчаси ташқарида қолиб кетган эди (кўчада қолганлар танаффусда стадионга ёриб кириб кетишаган). Бизнинг муттасадилар, меҳмон жамоа мураббийларини ва айрим ўйинчиларини стадионнинг югуриш йўлакчасида кутиб олиб, уларга зарбоф тўнлар кийдириб, катта эҳтиром кўрсатишган эди. Шу ерда мен ўз ҳикоямни тўхтатиб бу ёғига ўша иккала ўйнида қатнашган ва рақиб дарвозасини бир неча марта ишғол қилган, машҳур ҳужумчи Тўлаган Исоқов хотиралари билан давом эттираман.
- Ўша 1975 йил биз учун ноқулай келган бўлсада, Киев «Динамо»чиларидан устидан қозонилган улкан икки ғалаба билан эсда қолди. Ёзда биз Киевда ўйин ўтказишимиз керак эди, аксига олиб тренеримиз Вячеслав Дмитриевич Соловьёв инсульт булиб қолиб, анча вақтга сафдан чикиб қолдилар. Уларни ўрнини вақтинча Геннадий Красницкий эгаллаб турди. Киевликлар улкан ғалабалар сари олдинга интилишар эди. Аммо 20 июнда стадионга келган 40 минг мухлис, ўзларининг севимли жамоасини «Пахтакор»дан қабул қилиб олинган кутилмаган мағлубиятига гувоҳ булдилар. 60-дақиқада Михаил Ан томондан менга аниқ узатилиб берилган тўпни дарвозабон устидан ошириб, бўш дарвозага йўллашим кифоя қилди 1-0. Шу ҳисоб ўйин охиригача сақланиб қолди.
Ўйин тугагач биз бир-биримизни ғалаба билан табриклаб майдонни тарк этардик. Ўша кечда Украина марказий компартия қўмитаси раиси В.В Шербицкий «Динамо» ўйинчиларини ечиниш хонасидан икки соат давомида чиқармай мураббий ва ўйинчилар билан «разбор» уюштирган эди. Чунки улар учун ҳар бир очко олтиндек қиммат эди. Сўнгра у бизнинг ҳам ечиниш хонамизга кириб ҳаққоний ғалаба билан табриклади.
Биз бир неча йиллар давомида киевликлар учун ноқулай рақиб бўлиб келганмиз. Шу сабаб Олег Блохинни жуда кўп асабийлшганини кўрганман. Ўша йили «Динамо»чилар, собиқ Иттифокнинг ва Европанинг кўплаб нуфузли совринларига эга чиқишган. Менга айтишларича мавсум сўнггида Олег Блохинга – «Сиз учун энг ноқулай ҳимоячи ким?» деб сурашганида у:- «Мен учун ноқулай ҳимоячи йўқ, аммо мен учун ноқулай жамоа бор бу - «Пахтакор» деб жавоб берган.
Киевдаги ғалаба тасодиф эмаслигини, биз мавсум охирида Тошкентда, "динамочилар" устидан 5-0 ҳисобидаги оламшумул ғалаба билан исботладик. Ўшанда бизнинг ажойиб тўртлик яъни – Ан-Фёдоров-Хадзипанагис-Исоқов ўзини кўрсатган эди. Киевликларни бизда алами борлиги яққол сезилиб турарди, улар Киевдаги мағлубият, бу бир тасодифлигини исботлашмокчи эдилар. Устига устак уларни Москва «Динамо»чилари ва Донецкнинг «Шахтёр»и изма-из қувиб келишаятган эди, уларга энди очко йўқотиш мумкин эмасди. Ўйининг биринчи 20 дақиқаси бизнинг тинимсиз ҳужумларимз остида ўтди, биз киевликларга хатто тўпга тегинишга ҳам йўл қўймасдик ва рақибларимизни мана шундай темпда ўйнашга мажбурладик.
Владимир Фёдоров ҳар хил манёврлар орқали рақиб ҳимоячиларини чалғитиб уларни ўзининг ортида олиб юрарди. Шу сабали мен ва Миша Ан иккитадан гол урдик, яна битта голни Хадзипнагис ўз ҳисобига ёзиб қўйди. Ўйин сўнггида Блохинни асабийлашганини кўрсангиз эди. Ўйин тугагач, Лобановский деярли бир соат мобайнида ўйинчиларни ечиниш хонасидан чиқармади!
Ўша ўйиндан кейин киевликларни мағлубияти ҳакқида турли туман гап-сўзлар пайдо бўла бошлади. Гўёки биз ўйинни сотиб олган эмишмиз. Киевликларга ҳар бир очко сув ва ҳаводек керак бўлиб турган бир пайтдая? Қандай беъманилик. Мен тирик гувоҳдек шуни таъкидлаб ўтишни хоҳлардимки, ҳеч қандай олди-берди бўлмаган, йигитлар ўз олдиларига аниқ мақсад қўйган ва бу мақсадга эришишда оз мунча тер тўкишмади. Сабаби биз бир оиладек эдик.
1975 йилнинг охирида киевлик Трошкин ва Колотов, менинг дўстим Вячеслав Кольцовни, собиқ Иттифок ва Европанинг деярли барча совринларига эга чиққан «Динамо»нинг тақдирлаш маросимига таклиф қилади. "Октябрьское" спорт мажмуасининг банкетлар залида бўлиб ўтган катта маросимда қатнашган кўпгина расмийлардан бири табрик сўзи олиб, киевликларга қарата шундай дейди: - «Мен сизларга кейинги йилда дунёнинг энг кучли жамоасини мағлубиятга учратишларингни тилайман! — деб сўнг бироз сукут сақлайди. Ўтирганлар эса бир-бирларига қараб ўйланиб қолишди, биз яна кимни ютишимиз керак экан деб, «Манчестер», «Сантос»…сукутдан кейин бояги одам ўз сўзини давом эттирди: «Пахтакор»ни!
P.S. Тошкентдаги ўйинда мухлислар сонини тассавур қилсангиз эди, хатто секторлар оралиғида йўлакчалар ҳам мухлислар билан тўлиб тошган. Секторга кира олмай тепада тик туриб томоша қилаятганларни ўзи уч қаторни ташкил қилар эди. Ўйин тугагач барча байрамона кайфиятда стадионни тарк этарди. Стадион ортида, вилоятлардан мухлисларни шу ўйинни кўриш учун олиб келган автобуслар сони ҳам анчагина эди. Барчада ҳуш кайфият ва мамнулик жўш уриб турарди. Чунки «Пахтакор» бу бутун Ўзбек халқи жамоасидир!!!
2010 йил Онишенко олой бозорида. У "Динамо" Киев скаути сифатида Одил Аҳмедовнинг ўйинини кузатиш учун Тошкентга келган эди.
"Пахтакор" (Тошкент) - "Динамо" (Киев) - 5:0 (1:0)
Тошкент. "Пахтакор" Марказий стадиони. 17 октябрь.
Ҳакамлар: В. Лушин, В. Жарков (иккиси - Москва), Ю. Игнатов (Калуга).
"Пахтакор": Филатов, Корчёнов, Иванков, Могильный, Белов, Серостанов, Жуков, Ан, Исоқов, Фёдоров, Хадзипанагис.
"Динамо": Самохин, Коньков, Зуев, Фоменко, Решко, Дамин, Мунтян, Онишенко, Кочубинский, Буряк, Блохин (Слободян, 46).
Голлар: Хадзипанагис (35), Исоқов (51, 57), Ан (79, 88 - пенальтидан).
Огоҳлантиришлар: Кочубинский.
Similar news
![AMP Logo](https://championat.asia/image/logo-amp.png)
Comments