Мурод Отажонов: “Ёшларимизда жамоавий ўйин яхши шаклланмаганлиги билиниб қолди”

Таниқли мутахассисга мурожаат қилиб, олимпия терма жамоамизнинг Осиё чемпионатидаги иштироки ҳақида сўрадик. 

- Албатта олимпия терма жамоамизнинг Осиё чемпионатидаги иштирокини кузатиб бормоқдаман. Афсуски биз кутган натижа рўй бермади. Барчамиз олимпиада йўлланмасини қўлга киритиш тарафдори эдик. Лекин тажриба етишмаслиги панд берди. Рақибларимиз ҳам анойилардан эмасди. Уларда ҳам футбол йилдан-йилга ривожланиб бормоқда. Буни ўйинлар орқали кўрдик. 

- Назаримда ёшларимизда жамоавий ўйин яхши шаклланмаганлиги билиниб қолди. Футбол бу жамоавий ўйин. Кураш ёки бокс каби унда битта шахсга боғлиқ бўлмайди. Ҳамма йигитлар харакат қилиши керак эди. Аммо ўйинчилар охиригача юқори савияда ўйнай олмади.  

- Жанубий Кореяга қарши баҳснинг иккинчи бўлимида йигитлар 30 дақиқа жуда яхши харакат қилганини алоҳида эътироф этиш керак. Бироқ қолган вақтларда фаоллик кузатилмади. Ироқ билан учрашувда эса дастлабки 25 дақиқа яхши ўйнаб туришганди. Кейинчалик эса уларнинг шашти пасайиб кетти. 

- Олимпиада йўлланмаси учун курашиляптими, демак тайёргарлик ҳам шунга яраша жиддий бўлиши керак эди. Футболчиларни эртароқ йиғиш зарур эди. Натижада йигитларнинг бир-бири билан тўлиқ тушуниб кета олмаслиги кўриниб қолди. 

Исломбек Рустамбеков.