Мурод Исмоилов: "Иккита хато қимматга тушди"

"Рақибнинг имкон қадар кўпроқ ўйинларини кўриб таҳлил қилишга ҳаракат қилдик. Ўйинга қўйган режаларимизнинг кўпини йигитлар амалга оширишди. Фақат иккинчи гол ўтказилган вазиятда хатога йўл қўйилди. Бундай маҳоратли рақиблар биттагина хатодан унумли фойдаланишади", - дейди Мурод Исмоилов.

"Бундай тезкор ўйин кечаётган вақтда захирадан тушган футболчилар баҳсга киришиб кета олишмайди. Шу боис Акмал Холматов ва Бахтиёр Ёқубовни алмаштирмадик. Мансур Саидов, Жавоҳир Расулов ва Жаҳонгир Меҳмоновнинг йўқлиги билинди".

"Кашкавал жамоага яқинда келиб қўшилди. Унга бироз вақт керак. Сабаби янги футболчилар билан тил топишиб кетиши керак. Кейинги баҳсларда Адриан янада яхши ҳаракат қилса керак".

"Океан орти давлатлардан футболчиларни таклиф қилиш учун катта пул керак бўлади. Савия қанчалик юқори бўлса унинг нархи ҳам қиммат бўлиши табиий. Ҳозирги келаётган легионерлар эса маҳаллий футболчилар билан деярли тенг нархда. Бизнинг мақсадимиз ёшларни тарбиялаб уларни асосий жамоага қўшиш. Унга қадар легионерларни оламиз, бошқа клублардан футболчиларни ижарага оламиз...Барча ўз шароитидан келиб чиқади".

"Насаф" ва "Локомотив"ни ўз уйимизда қабул қилдик. Иккала клуб бизга етарлича қаршилик кўрсатди. Бекорга улар юқори поғоналарда боришмаяпти. Ўтган йилги ҳолат ва айни пайтдаги ҳолатни таққослаб кўринг. Биз анчагина ўсишга эришдик. Аммо йигитлар ўзларига келишмаса бу нарса 6 сонияда сочилиб кетиши мумкин".

"Навбаҳор" билан баҳсга жиддий тайёрланамиз. Барча жамоалар бизга қарши кучли ўйнаши аниқ. Шу боис мухлисларимиз ва раҳбариятни юзини ерга қаратмаслигимиз керак".

“Аббос Махсталиев бугун ҳимоячи вазифасини бажаргани рост. Сабаби “Локомотив” билан очиқ ўйин намойиш этиб бўлмайди. Бугун 1:2 эмас 1:5 бўлиши мумкин эди. Шу боис Махсталиев бешинчи ҳимоячи сифатида ўйнади”.
“ОЧЛга тайёр бўлганимиздан кейин чиқишимиз керак. Йўлланма олиб гуруҳда кучли рақибларга йирик ҳисобларда ютқазсак Ўзбекистон шарафини муносиб ҳимоя қила олмай қолсак ҳам бўлмайди. Шу боис Чемпионлар лигасига тайёр бўлганимизда чиқамиз, бунга оз қолди. Керак бўлса чемпионлик учун ҳам курашамиз, озгина вақт керак”.

Комилжон Икромов