Мурод Исмоилов: "Бугун мағлуб бўлмаслик жуда муҳим эди"

Дастлаб журналистлар билан "Нефтчи" бош мураббийи Мурод Исмоилов суҳбатлашди.

"Водий дербилари доим кескин курашлар остида кечади. Бугунги баҳс ҳам мустасно бўлгани йўқ. Иккала жамоа ҳам муносиб ўйин кўрсатишди. Мухлисларга ёқадиган ўйин бўлди.

Қишдаги назорат ўйинларида стандарт вазиятлардан гол ўтказиб юбориб 5та учрашувни бой бергандик. Бугун ҳам шундай бўлди, стандартдан гол қўйиб юбордик. Лекин ўзимиз ҳам айнан стандарт вазиятдан сўнг жавоб тўпини киритдик.

Икки мағлубиятдан сўнг бугунги дуранг бизга жуда керак эди. Ғалаба қозонсак зўр бўларди, аммо асосийси ютқазмадик. Йигитлар руҳан бироз ўзларига келиб олишди деб ўйлайман. Бугунги "Навбаҳор"нинг ўйини менга ёқди. Ашурматов яхши жамоа шакллантиргани кўринди.

Бугун "лочинлар" сафида "Нефтчи"нинг бир қатор собиқ футболчилари ўйнашди. Биз ҳам ўз вақтида "Нефтчи"дан кетганимиздан сўнг 2000 йил "Насаф" ўз уйида "Нефтчи"ни қабул қилган. 4та голнинг барчасини фарғоналиклар уришганди. Мен, Рустам Абдуллаев, Баҳром Ҳайдаров ва адашмасам Қаҳрамон Абдуқодиров урганди. Ҳар қандай футболчи собиқ клубига қарши ўйинда ўзгача ҳаракат қилади", - дейди Мурод Исмоилов.


Шерзод Ҳамдамов ёзиб олди