Муҳиддин Ортиқов: "Қўқон-1912"ни ютишимиз ҳам мумкин эди"

Учрашувда биринчи бўлиб ҳисобни айнан ёш қалдирғочлар очди. Якунда эса қўқонликлар пеальтидан жавоб тўпини киритиб, дуранг қайд этишди. Учрашувдан сўнг "Бунёдкор-2" бош мураббийи Муҳиддин Ортиқов билан суҳбатлашдик. 

- Майдонинг ҳолати яхши эмасди. Албатта сафарда биз учун жуда қийин ўйин бўлишинит олдиндан билгандик. Майдоннинг холати яхши эмаслиги ҳар иккала жамоага ҳалақит берди. Агарда майдон сифати яхши бўлганида бундан-да чиройли ўйин кўрсатиш мумкин эди. Таркибимиз бошқаларга нисбатан ёш. Айниқса ҳимоячиларимиз. Шу боис "Қўқон-1912"га қарши баҳсда ҳам ҳимоячиларимизнинг тажрибаси камлиги натижасида тайёр ғалабани қўлдан бой бердик. Агарда маҳоратли ҳимоячиларимиз бўлганида сафарда ютишимиз ҳам мумкин эди.

- "Қўқон-1912" яхши жамоа. Таркиби ҳам кучли. Фақат улар ҳам майдоннинг яхши холатда бўлмагани сабабли қийналишди. Уларда ҳам гол уриш учун яхши имкониятлар бўлди.

- Учрашув тенг курашлар остида кечди деб ўйлайман. Ҳар иккала жамоа ҳам қулай вазият пойлади. Мезбонлардан кўра биз яхши ўйин намойиш этдик. Бемалол айтишим мумкинки, Қўқондан ғалаба билан қайтишимиз ҳам мумкин эди. Хусусан стандарт вазиятларнинг бирида тўп дарвоза тўсинига тегиб қайтди. Агарда шу зарба дарвоза тўридан жой олганда, ўйин умуман бошқа руҳда ўтарди.

- Лекин шунга қарамай қониқарли натижага эришдик деб ҳисоблайман. Чунки ўз олдига олий лигага чиқишни мақсад қилган жамоа билан сафарда дуранг ўйнаш ижобий натижадир.

- Кейинги турни ҳам тақвимга кўра сафарда ўтказамиз. "ЎзДонгЖу"га қарши баҳсгача ҳимояда йўл қўйган хатоларимиз устида ишлаймиз.

Исломбек Рустамбеков суҳбатлашди.