Миржалол Қосимов: "Омад биз томонда бўлди"
22 sep 2017 10:23
News
![](https://championat.asia/upload/storage/279080_original.jpg)
![](/upload/storage/279080_220.jpg)
Миржалол Қосимов: "Омад биз томонда бўлди"
- Миржалол ака, ғалаба билан табриклаймиз. Аввало ўйин борасида тўхталсангиз…
- Бугун жанговор ўйинга гувоҳ бўлдик. «Динамо» жамоаси бизга жиддий қаршилик кўрсатди деб айта оламан. Умуман олганда, бугунги ўйинда омад биз томонда бўлди деб ўйлайман. Чунки, ўйин бошида стандартдан тезкор гол урган бўлсак, иккинчи бўлим бошида ҳам стандарт вазиятини голга айлантириб, ишончли ғалабага эришдик. Ўйин якунигача мухлислар томошабоп ўйин кўришди. Қийин ўйин бўлди.
- Тезкор гол кутилмаган ва ўзига хос тарзда киритилди. Ушбу стандарт вазияти устида машғулотларда кўрсатма берилганмиди ёки тасодифий гол?
- Аввало, гол киритилган вазиятда омад биз томонда бўлди. Иккинчидан эса, албатта, бундай вазиятлар ўз-ўзидан бўлмайди, стандарт вазиятлари устида иш олиб борилади. Машғулотлардаги ишларимиз бугун ўз самарасини берди.
- «Динамо» ўтган турда Бухородан дуранг натижа билан қайтган эди. Бу жамоа ўйинини қай даража ўрганган эдингиз?
- Албатта, «Динамо»ни яхши ўрганган эдик. «Динамо» бизгача «Қўқон-1912», «Пахтакор», «Бухоро» каби пешқадамлар билан 0:0 ўйнаганди. Биз ўша ўйинларни ўрганиб, тайёргарлик кўргандик.
- Ишончли ғалаба қозонилган бўлсада, шогирдларингиз ўйинидан қониқмагандек бўлдингиз…?
- Футбол ўзи шунақа ўйин спорт тури, ҳар доим ҳам барчасидан қониқмайсиз. Асосийси ғалабага эришдик. Фақат ўйинимиздаги айрим жиҳатларимизни янада кучайтиришимиз керак.
- Тезкор голлар ўйин тақдирини ҳал этди. Бу сизнинг қўл остингиздаги «Бунёдкор»нинг энг осон ғалабаси бўлди, деган фикрга қўшиласизми?
- Йўқ, асло бундай фикр нотўғри. Биз бу учрашувга ҳафталаб тайёргарлик кўрган эдик. Омад туфайли тезкор голлар вазифамизни нисбатан осонлаштирган бўлсада, бугунги ғалабага эришиш учун кўп куч ишлатдик. Умид қиламанки, йигитларимиз кейинги ўйинларда янада яхшироқ тўп сура олишади.
Similar news
![AMP Logo](https://championat.asia/image/logo-amp.png)
Comments