Миржалол Қосимов: «Мусобақани чиройли якунлаб қўйишимиз керак»

Миржалол Қосимов: «Биз учун имкониятлар тугаган. Лекин мусобақани чиройли тарзда якунлаб қўйишимиз керак. ОЧЛдаги охирги ўйинда мухлисларга чиройли ўйин тақдим этиб, ғалаба учун курашамиз. АГМК мухлислар ва жамоа ғурури учун ҳам ўйнайди. ОЧЛ тугаётгани билан ҳаёт давом этади. Бизни ички чемпионатда ҳам ҳали узоқ мавсум кутмоқда. Биз эртанги баҳсга жиддий тайёргарлик кўряпмиз. Иккала жамоада икки хил вазият. «Истиқлол» билан ўйин қизиқарли бўлади»

— «Истиқлол» ҳимоявий ўйнайди. Эртага АГМК ҳам ўйинни ҳимоядан қурадими? Иккинчи саволим, эртага ёш футболчиларга имкониятлар бериладими?
— Биз ҳимоявий услубда ўйнамаймиз. Йўқотадиган нарсамиз йўқ. Эртага «Истиқлол»нинг тартибли ҳимоясини ёриб ўтишга интиламиз. «Истиқлол»нинг ҳимояси нафақат биз учун, балки «Шабаб Ал Аҳли» ва «Ал Ҳилол»га ҳам катта муаммо бўлди. Иккинчи саволга келадиган бўлсам, албатта бизда ҳаммага имкониятлар берилади. Ўтган ўйинларда ҳам имкониятлар берилди.

Санжар Турсунов: «Биз бўлажак ўйинга 1-тур учрашувига қандай тайёргарлик кўрган бўлсак худди шу муносабатда тараддуд кўряпмиз. Эртага биздан мураббийлар ва мухлислар фақат ғалаба кутишади ва биз ҳар доимгидек ғолиб бўлиш учун ҳаракат қиламиз».