Миржалол Қосимов: "Чемпионат ўзининг қизғин палласига кирди"

- Ўйин ҳақида

- Жуда ҳам оғир ўйин бўлди. Чемпионат ўзининг қизғин палласига кирди, чунки юқори ўринлар учун ҳам, лигада жон сақлаб қолиш учун ҳам кураш давом этяпти. Баҳс қизиқарли, жанговар тарзда ўтди. Қолаверса, учрашув ёмғир остида ўтгани туфайли тез суръатларда кечди. Ўйлайманки, ҳақли равишда ғалаба қозондик. Негаки биринчи тайминг ўзида кўплаб голли вазиятларни юзага келтирдик. "Металлург" футболчиларига қойил қолиш керак, жамоа очко қўлга киритиш учун жонни бериб ҳаракат қилди. Ёмғир ёғиб турганига қарамасдан, мухлислар ҳам севимли жамоасини охиригача қўллаб-қувватлаб турди. Фурсатдан фойдаланиб, "Металлург"га омад тилаб қоламан.

- АГМК ҳозирча 2-ўринда турибди. Жамоанинг кумуш медални қўлга киритиш имкониятини қандай баҳолайсиз?

- Зўр имкониятга эгамиз. Агар чемпионат бугун тўхтатилса, айнан 2-ўринда қоламиз (кулади). Ҳали ўйинлар олдинда, шунга ҳаракат қиламиз. Мақсадимиз – мухлисларимизни шод этиш. Ҳар бир ўйинга жиддий тайёргарлик кўриб, 2-ўринни қўлга киритишга уринамиз.

- Тимур Кападзе У-23 Осиё кубоги саралаш босқичи учун Ўзбекистон ёшлар терма жамоасига жалб этилган футболчилар рўйхатини эълон қилди. Унда чемпионликни қўлга киритган АГМК U-21дан ҳеч ким йўқ. Шу ҳақда қандай фикрдасиз?

- Йил бошида ҳамма жамоалардан футболчиларни жалб қилишган. "Олимпик"да бизнинг ўйинчимиз ҳам бор. "Олимпик" жамоаси бекорга ташкил этилмади.

- Александр Касьяннинг бекор қилинган голи ҳақида...

- Аниқ билмайман, бир нарса дейиш қийин. Ўйинда ВАР ишлади ва унда малакали мутахассислар фаолият кўрсатишди.