Миржаҳон Мираҳмадов: “Машъал“ни ҳурмат қиламиз. Лекин, ғалаба учун майдонга чиқамиз”

Вадим Абрамов шогирдлари бугун ноқулай об-ҳаво шароитига қарамасдан машғулотларни табиий қопламали майдонда ўтказишди. Таркибдаги барча футболчилар мураббийлар штаби томонидан берилган кўрсатмаларни астойдил бажаришди. Гарчи ёмғир ёғиб майдон ҳолатига бироз салбий таъсир қилган бўлсада, футболчилар тўп билан ишлашди. Турли тактик услублар ва чизмалар синовдан ўтказилди. 

Легионерлардан туркманистонлик Селим Нурмурадов жароҳатини тиклаш билан банд. Тожикистонли Давронжон Эргашев машғулотларда ўзини ҳар томонлама кўрсатишга ҳаракат қилмоқда. Дарвозабонлар билан доимгидек Абдусаттор Раҳимов алоҳида иш олиб борди. 

Биз эса якунда иқтидорли ҳужумчи Миржаҳон Мираҳмадовнинг фикрлари билан қизиқдик.

“Бўлажак баҳсга тараддуд кўнгилдагидек кетмоқда. Жамоада кайфият аъло даражада. Мана, бугунги машғулот ҳам қувноқ кайфиятда ўтди. “Машъал” билан беллашувда ғалаба учун майдонга чиқамиз. “Сурхон” билан ўйиндаги ғалаба тарихда қолди. Эндиликда навбатдаги учрашувга жиддий қараяпмиз. Зеро, рақибимизни кучсиз демаган бўлардим. Уларга тўғри муносабатда бўлган ҳолда тўп тепамиз. Уларни ҳурмат қиламиз. Жорий йил ҳисобидан биринчи уй баҳсида уч очкони ўзимизники қилмоқчимиз. Бизнинг мақсадимиз доим юқори бўлиб келган. Демак, ҳар бир турда максимал очко жамғаришга ҳаракат қиламиз. Мухлислардан стадионга келиб қўллаб-қувватлаб туришларини сўраб қоламан”, - деди Мираҳмадов.

Абдулазиз Искандаров ёзиб олди