"Милан" мухлислари Доннаруммага либосини қайтариб отишди

"Аталанта"га қарши учрашувдан сўнг "Милан" жамоаси футболчилари уларни қўллаб-қувватлагани учун мухлислар ўтирган секторга келиб ташаккур айтишди. Футболчилар мухлисларига ўзларининг либосини отишди. Gazzetta dello Sport нашрининг хабар қилишича, мухлислар Абате, Романьоли, Бонуччи ва бошқа футболчиларнинг либосларини қабул қилиб олишди. Жамоа дарвозабони Доннарумма ҳам либосини мухлисларга отганди, аммо мухлислар Жанлуижининг либосини ўзига қайтариб отишди. Дарвозабон бундай муносабатдан ҳайратга тушган.