Милан Митрович: "Сўғдиёна" кеча охирги дақиқаларда кўрсатган ўйинини қилиши керак"

Учрашув давомида мезбонлар яъни "Бунёдкор" жамоаси катта устунликка эга бўлди. "Қалдирғочлар" Милан Митрович дарвозаси олдида бир қанча кескин вазиятлар яратишди. Бироқ уларнинг голга айланишига сербиялик посбон йўл қўймади. Қайсидир маънода ушбу ўйин қаҳрамони Митрович бўлди, десак янглишмаймиз. Учрашувдан сўнг унинг фикрлари билан қизидик. 

"Мавсумнинг илк ўйини доим руҳий жиҳатдан қийин ўтади. Гарчи жисмонан ва тактик томондан тайёр бўлсангиз ҳам майдонда ҳиссиётлар рол ўйнайди. Эътибор берган бўлсангиз, учрашувни жуда яхши бошладик. 2та жуда яхши вазиятдан фойдаланганимизда балки ўйиннинг бориши ўзгариб кетарди. Кейинги дақиқаларда билмадим, нима учундир баҳс назорати "Бунёдкор" томонига ўтиб кетди. Бизнинг бўшашимиз ва орқада ўйнашимиз рақибга устунлик берди. Мана шу паллада кетма-кет ҳужумлардан сўнг "Бунёдкор" футболчиларида ишонч пайдо бўлди.  Бу - "Сўғдиёна"нинг ўйини эмас, биз ҳар бир учрашувда кеча охирги дақиқаларда кўрсатган ўйинимизни қилишимиз керак. 

Икки жамоа ҳам вазиятлардан самара чиқара олмаганини инобатга олганда, дуранг адолатли натижа. Мақсадимиз кучли учликка кириш",- дейди кипер. 

Суперлига. "Бунёдкор" Тошкентда "Сўғдиёна" билан кечган учрашувда нурсиз дурангга имзо чекди