"Металлург" устози Луисма Эрнандес: "Энг юқори ўринлардан бирини эгаллаш учун астойдил ҳаракат қиламиз"

Бугун сайтимиз ходимлари Бекобод клуби машғулотларидан репортаж тайёрлашди ҳамда жамоа устозига саволлар билан юзланишди.  

- Туркиядаги йиғин ҳақида қисқача фикрларингиз...

- Авваламбор, Антальяда эканлигимдан хурсандман. Яхши меҳмонхона, ажойиб стадион ва тренажёр зали – ҳаммаси яхши ташкиллаштирилган. Бу сафарни ташкиллаштириб берган "Металлург" раҳбариятига алоҳида раҳмат! 

- "Металлург" қишки йиғинни нима учун айнан Антальяда ўтказмоқда? 

- Биринчи навбатда, сабаб сифатида Туркиянинг иқлимини келтириб ўтиш мумкин. Шунингдек, бу ерда максимал шароитлар яратилган. Булар мавсумолди йиғинда катта ёрдам беради. Қўшимчасига спарринг-рақиблар билан ўйин ўтказиш учун яхши имконият бор.

- Дейлик, агар Тошкентда худди мана шундай шароит мавжуд бўлса, жамоа йиғинни ўзимизда ўтказиши мумкинми? Клубларимизни Антальяга жалб қилаётган асосий нарса нима?

- Албатта, агар 4-5 та яхши шароитга эга майдонлар бўлса, Тошкентда тайёргарлик кўриб, рақибларни ҳам ўша ерга таклиф қилардик. Бу ҳолатда об-ҳаво ҳам инобатга олинган. Чунки ўтган йили қишда жуда ҳам совуқ бўлган. Шунинг учун жамоалар Антальяга ошиқишади. Ўйинчилар учун аввало майдон сифати муҳим.  

- Раҳбарият жамоа олдига қандай мақсадни қўйган ва "Металлург" юқори ўринлар учун кураша оладими?

- Биз ҳозир яхши жамоа қуришни мақсад қилганмиз. Чемпионатда энг юқори ўринлардан бирини эгаллаш учун астойдил ҳаракат қиламиз.

- Айни пайтда сизни нима хавотирга солмоқда?  Футболчиларга ўз ғояларингизни етказишда муаммоларга дуч келмаяпсизми? 

- Умуман олганда, мен футболчилардан мамнунман. Тўғри, озгина тушунмовчиликлар бўлиб туради. Бу янги ишланмаларни жорий қилаётганда юз беради, лекин биз машғулот олдидан йиғилиш қилиб, йигитларга видеоролик ва тақдимотлар орқали тушунтиришга ҳаракат қиламиз. Кейин эса барини бевосита майдонда синовдан ўтказамиз.