“Металлург” ва "Олмалиқ" уч кун ичида учта ўзаро ўйин ўтказишди

Дербида бекободликлар устунлик қилишди.

Жума куни Бекободдаги А.Анохин номли стадионда мазкур клубларнинг ёшлар таркиблари куч синашишди. Кучли шамол остида ўтган ўйинда дарвозалар даҳлсизлиги сақлаб қолинди. Шундай бўлса-да, ҳар иккала жамоа мураббийлари ўз шогирдларининг ҳатти ҳаракатларидан қониқиш ҳосил қилганликларини яширишмади.

Шанба куни эса мазкур ўйингоҳда “Металлург” ҳамда “Олмалиқ” клубларининг қизлар жамоалари ўртасида назорат учрашуви ўтказилди. Маҳорат борасида рақибаларидан устун саналувчи бекободликлар буни амалда ҳам исботлашди. Ўйин “Металлург-вумен”нинг 3:1 ҳисобидаги ғалабаси билан якунланди. Мезбонлардан голларнинг учаласини ҳам жамоа тўпурари Людмила Карачик киритди. Ўз навбатида “Металлург-вумен” таркибини “Севинч” жамоасининг собиқ ўйинчилари Маҳлиё Сарикова, Феруза Турдибоева ҳамда Зумрад Назаровалар билан кучайтирганлигини айтиб ўтиш лозим. Шунингдек, жамоа энг тажрибали ўйинчиларидан бири Наргиза Абдурасулова билан хайрлашди. Унинг эндиликда қайси жамоада фаолият олиб бориши ҳозирча аниқ эмас. “Металлург” футбол клуби раҳбарияти ва мухлислари номидан Наргиза Абдурасуловага жамоа муваффақиятларига қўшган катта ҳиссаси учун миннатдорчилик билдирамиз.

Энди “Олмалиқ” ва “Металлург” жамоаларининг асосий таркиблари ўртасида бугун бўлиб ўтган ўртоқлик ўйини хусусида. Мазкур назорат учрашуви Олмалиқ шаҳрида ташкил этилди ва унда бекободликлар 3:1 ҳисобида зафар қучишди. Меҳмонлардан голларни Дилмурод Каримов ва Исломжон Қобилов биринчи таймда ҳамда Алишер Зиёвуддинов иккинчи таймда 11 метрлик нуқтадан киритишди. Шу ўринда “Металлург” устози Рустам Мирсодиқов мавсумга тайёргарлик кўраётган барча ўйинчиларини синаб кўрганлигини айтиб ўтиш лозим. Биринчи таймда фаолият юритган 11 нафар ўйинчига иккинчи таймда дам берилди ва майдонга бошқа 11 нафар футболчи туширилди.

Бугунги ўйиндан кейин мураббийлар штаби футболчиларга бир кунлик дам беришди. Эртадан жамоа аъзолари Чирчиқ шаҳрида тўпланишади ва 1-тур ўйинига тайёргарликни давом эттиради. Эслатиб ўтамиз, “Металлург” янги мавсумни ўз уйида олий лигага қайтган Самарқанднинг “Динамо” жамоасига қарши ўйин билан бошлайди.

"Металлург" матбуот хизмати