Мексикада порлаган юлдуз "Нефтчи"га ўтишга яқин

"Нефтчи"да катта ўзгаришлар бўлмоқда. Жамоага Вадим Абрамов бош мураббийи этиб тайинланганидан кейин клуб раҳбарияти бир қатор футболчиларни "Нефтчи"га олиб келишга ваъда беришган.

Маълумотларга кўра, фарғоналиклар сафини биринчилардан бўлиб янги футболчилардан Мексика-2011даги мундиалда порлаган ҳужумчи Тимур Ҳакимов тўлдириши кутилмоқда.

Шунингдек, Абрамов "Нефтчи"га "Локомотив"да бирга ишлаган футболчиси Алишер Шоғуломовни ҳам таклиф этиши кутилмоқда. Катта эҳтимол билан Шоғуломов ва Ҳакимов иккинчи даврани "Нефтчи"да бошлайди.

Алишер Шоғуломов биринчи даврани "Бухоро"да бошлаганди. Тимур Ҳакимов эса яқиндагина Москвада жароҳатини операция қилдириб қайтганди. Футболчи якка тартибда шуғулланиб ўз спорт формасини тиклаётганди. Айни пайтда Ҳакимов эркин агент саналади.

Давралар оралиғида "Нефтчи" яна бир қатор янги футболчилар билан кучайтирилиши кутилмоқда. Яхши савиядаги легионерлар ҳам келиш эҳтимоли мавжуд.