Мбаппе "Юве"га қарши ўйинда қабул қилган қарорлар Неймарнинг жаҳлини чиқарди

Килиан Мбаппе ва Неймар "Ювентус" билан ўйиндан сўнг ҳужумда қандай ҳаракат қилаётганликлари ҳақида гаплашишди.

"L’Équipe" нашри хабарига кўра, Неймар Мбаппенинг Чемпионлар Лигаси гуруҳ босқичидан ўрин олган ПСЖ – "Ювентус" (2:1) ўйинида қабул қилган қарорлари туфайли ғазабланган.

Бразилиялик футболчи шунчалик норози эдики, клубнинг матбуот анжуманида иштирок этишни хоҳлайсизми, деган саволига ҳужумчи шундай деди: "Ишончингиз комилми? Аниқми? Чунки бугун журналистлар билан гаплашсам, бу муаммолар туғдиради!"

Мбаппе жарима майдончасига ёриб кириб, ўткир бурчакдан дарвозага зарба йўллади, ўша пайтда Неймар узоқ устунда ёлғиз турганди. Ўшанда Килиан ўзи зарба берди ва мўлжални аниқ олмади. Бу эпизод бразилияликнинг жаҳлини чиқарди.

"L’Équipe" хабарига кўра, Неймар ва Мбаппе ўйиндан сўнг учрашиб, муайян вазиятларда бир-бирларига пас беришмагани ҳақида гаплашишган.

Аввалроқ Мбаппе ПСЖнинг пенальти тепувчи асосий футболчиси этиб тайинлангани учун футболчилар ўртасида келишмовчилик юзага келгани айтилганди. Неймар бу бўйича Кристоф Гальтье танқид қилинган иккита твитга "лайк" босган, бироқ ўшанда масала ҳал қилинганди.

Маълумот учун, "Ювентус" билан ўйинда дублга эришган франциялик футболчи голларидан бирини Неймарнинг узатмасидан сўнг урди.