Мбаппе ва Ал Ҳелайфи ўртасида жанжал содир бўлган экан

Жума куни Франция терма жамоасининг 25 ёшли форварди мавсум охирида ПСЖни тарк этиши ҳақида эълон қилди.

Ўзининг хайрлашув видеосида Мбаппе мураббий, директор, стюард ва мухлисларга миннатдорчилик билдирди, аммо клуб президенти Носир Ал Ҳелайфи борасида ҳеч нарса демади.

Маълумотларга кўра, 2022 йилнинг ёзида Килиан билан футбол тарихидаги энг йирик битимни тузган Ал Ҳелайфи буни ҳақоратдек қабул қилган.

Носир Мбаппедан тушунтириш талаб қилади. Уларнинг учрашуви "Тулуза"га қарши баҳсдан бир соат олдин содир бўлади. Ал Ҳелайфи ва футболчи бегоналардан ҳоли хонада юзма-юз суҳбат қуришди.

Маълум бўлишича, суҳбат тезда боши берк кўчага кириб қолган ва томонлар ўзини тутиб тура олишмаган. "Улар бир-бирига жуда яқин келиб, бош уриштиришди" - деди воқеани кўрган гувоҳ.

Мбаппе ва Ал Ҳелайфи ўртасидаги жанжал туфайли ПСЖ футболчилари машғулотга белгиланган вақтдан 4 дақиқа кечроқ чиқишди.

Мбаппе ва Носир Ал Ҳелайф ўртасидаги муносабатлар 9 февраль куни, Килиан президентга ПСЖдан кетмоқчи эканлигини айтганида ёмонлашган.