Машариповнинг янги жамоаси бугун янги мураббий қўл остида илк ўйинини ўтказади
31 dec 2020 12:43
News

Машариповнинг янги жамоаси бугун янги мураббий қўл остида илк ўйинини ўтказади

Жалолиддин Машарипов "Пахтакор"ни тарк этиб Саудия Арабистони клубига ўтишга яқин турибди.

2020 йил якунларига кўра, Ўзбекистоннинг энг яхши футболчиси деб топилган Жалолиддин Машарипов шу кунларда Ар Риёд шаҳрининг "Ал Насср" клуби билан шартнома имзолайди.

Бу йилги Осиё чемпионлар лигаси ярим финалчиси бугун Саудия Пролигасида 11-турни сафарда "Ал Файсали"га қарши ўтказади. Маълумки, "Ал Насср"да яқинда мураббий ўзгарди. Қониқарсиз натижалар сабаб Руи Витория ўз лавозимини тарк этди ва унинг ўрнини бош мураббий вазифасини бажарувчи сифатида Ален Хорват эгаллади.

"Ал Насср" футболчилари "Ал Файсали"га қарши янги мураббий бошчилигида тайёргарлик кўришди ва бугун ушбу мутахассис қўл остида илк бор майдонга тушишади. Учрашув Тошкент вақти билан 19:55да бошланади.