Марко Станоевич: "Насаф"дан кетишим мумкин эди, фақат..."
18 feb 2021 13:35
News
![](https://championat.asia/upload/storage/620779_original.jpg)
![](/upload/storage/620779_220.jpg)
Марко Станоевич: "Насаф"дан кетишим мумкин эди, фақат..."
Ортда қолган давр мобайнида кўпчилик мухлисларнинг меҳрини қозонган футболчи янги мавсумни "Насаф"да бошлайди. У клуб билан янги шартномага имзо чекди. Биз бу борада Марконинг фикрларига қулоқ тутдик.
- Марко, бу йил ҳам "Насаф" шарафини ҳимоя қилишингиздан мухлислар хурсанд бўлишгани табиий. Сизга кўплаб жамоаларнинг таклифлар тушганига қарамасдан жамоада қолишингизга нима туртки бўлди?
- Жорий мавсумда ҳам "Насаф" сафида тўп тепишимдан хурсандман. Шу йилнинг охирига қадар янги шартнома имзоладим. Таклифлар бўлгани рост. Лекин, якунда Қаршида қолишга қарор қилдим. Сабаб сифатида нимани кўрсатишим мумкин? "Насаф"дан фақатгина жуда ҳам яхши таклиф бўлса, кетаман деб айтгандим. Шахсан ўзимга бу ерда ўйнаш ёқади.
- Сўнгги вақтларда рўй бераётган муаммолар жамоанинг ички муҳитига қанчалик таъсир қилмоқда? Эшитишимизга қараганда, муҳит унчалик яхши эмас экан...
- Жамоада ҳар доим ички муҳит яхши бўлган. Мен бу борада муаммо кўрмадим. Ўтган мавсум молиявий томондан қийинчиликларга дуч келинди. Шунга қарамасдан, совринли ўринлар учун курашдик. Муаммолар натижаларимизга таъсир қилмаслигига ҳаракат қилдик.
- Бобир Абдихолиқов, Шароф Муҳитдинов, Ислом Кенжабоев каби футболчилар бошқа клубларга йўл олишди. Улар жамоанинг етакчилари эди...
- Кенжабоев, Абдихолиқов, Шароф биз учун муҳим футболчилар эди. Улар ўзларини бошқа жамоада синаб кўришни лозим топишди. Бунга нормал ҳолат сифатида қараш керак. "Насаф"да ёш футболчилар кўп. Бу мавсумда улар ўзларини кўрсатишларига ишонаман.
- Янги мавсум учун режалар қандай?
- Муаммолар бартараф этилди. Маошлар берилди. Янги мавсумга яхши тайёргарлик кўряпмиз. Йилни "Пахтакор"га қарши суперкубок баҳси билан бошлаймиз. Бошқа жамоалар, уларнинг таркиби ҳақида фикр билдира олмайман. Мен ҳозир фақат "Насаф" ҳақида ўйламоқдаман. Ўзимиз иштирок этадиган барча турнирларда ғалабалар билан мухлисларимизни хурсанд қилишга ҳаракат қиламиз.
Абдулазиз Искандаров
Similar news
![AMP Logo](https://championat.asia/image/logo-amp.png)
Comments