"Манчестер Юнайтед" Райола билан жанжаллашмоқда: бу муаммо клубни АПЛ 5-ўринидан кўпроқ ташвишга солиши керак

"Бугун мен бошқа бирорта футболчини "Манчестер"га олиб бормасдим, – оловга керасин сепгандек деди Погба келажаги борасида гапираркан агент Мино Райола. – МЮ Марадона, Пеле ва Мальдинидек буюк футболчиларнинг ҳам фаолиятини синдирар эди. Бу жамоанинг на бир аниқ лойиҳаси, на бир танлаган йўли мавжуд эмас".

МЮ охирги 10 йилда "бошидан кўп нарсаларни ўтказди", лекин дунёнинг энг машҳур агентларидан бирининг бундай фикр билдириши клубдагиларни барибир ташвишга солиши турган гап. Бу клубнинг ишларига бевосита таъсир кўрсатмоқда. Аввал Холанднинг амалга ошмаган трансфери, ҳозир – катта эҳтимол билан Погбанинг кетиши, кетмаган тақдирда ҳам у жамоадан ажралиб бўлди. Сульшер франциялик ўрнига вариантларни кўриб чиқмоқда ва португалияликни олиб келишга жуда яқин. Келажакда Райола билан муносабатлар ёмонлашганининг салбий таъсири давом этадигандек.

Ўтмиш: Эрлинг Холанд

Холанд МЮ билан шартнома тузиши ҳал бўлган ишдек эди. Холанд Сульшер билан бирга "Мольде"да ишлаган ва айнан ўша ерда катта футболга кириб келганди. Сульшер футболчининг отаси (ва агентлардан бири) билан яхши таниш. Улар Норвегия термасида узоқ вақт бирга тўп тепган. Холанд АПЛда ўйнашни орзу қилади ва бу ҳақида бир неча бор айтиб ўтган. Келинг, очиғини айтайлик, МЮда у асосий таркиб футболчиси бўлиши аниқ эди. Сабаби ҳозир клубда бошқа марказий ҳужумчининг ўзи йўқ. Маркус вариант йўқлигидан у ерда ўйнаётганини унутмайлик.

Лекин музокарага Райола қўшилди ва ўзининг шартларини айтди. "Дортмунд" билан Райола (якунда футболчи айнан шу клубга ўтганидан хабарингиз бор) шартноманинг қуйидаги бандлари борасида келишиб олди – товон пули (у қадар катта бўлмаса-да) ва комиссия пуллари. Яъни Райоланинг ўзи ва футболчининг отасига жараёнда бевосита иштирок этгани учун яхшигина пул тўлаб берилди. МЮ бу шартларни бажаришдан бош тортди ва ўйиндан чиқди.

"Улар шунчаки трансфер амалга ошмаганидан жахлда, – жавоб беради Райола. Англияликлар билан трансферни Райола бузганмиди деган саволга агент шундай жавоб берди. – Биз одатдагидек музокалар ўтказдик, лекин футболчи бошқа йўлни танлади".

Дарвоқе, Холанднинг ўзи ҳам "Манчестер" вариантига шубҳа билан қараганди. The Athletic "Боруссия"нинг иқтидорлар билан ишлаш услуби – Обамеянг, Пулишич, Санчо, Дембеле, шунингдек айнан Холанд учун тузилган дастур футболчининг эътиборини тортган. Лекин айнан ишда Райола ҳам борлиги бу трансферни иложсиз қилиб қўйди.

"Манчестер" аввалига ҳатто Райоласиз ишни битирмоқчи бўлди. Клуб футболчининг отасига мактуб жўнатган, лекин Холланднинг отасига келган мактублар ўша ондаёқ Мино Райола почтасига ҳам кетаверган.

Бугунги кун: Поль Погба

МЮ – Райола – Погба воқеаси анчадан буён давом этмоқда. Қачонлардир агент "Ювентус"дан "Манчестер Юнайтед"га ўтишидан 41 миллион фунт ишлаб олганди. Ҳозир Райола Погбани бошқа клубга ўтказиш ниятидалигини умуман яширмаяпти ва барчасини тайёрламоқда.

Мисол учун, яқинда Погба тиббий текширувдан ўтганида кичик муаммо аниқланганди ва шошилинч операцияга ҳожат бўлмаса-да, футболчи бу ишни тезлаштирди ва икки ойга сафдан чиқди.

"Унга дарҳол операция қилиш кераклигини айтишган. Биз рентген қилдик – у ерда жиддий ҳеч нарса йўқ. Бу муаммони қачондир ҳал қилиш керак эди, лекин шошилинч ҳеч нима йўқ эди. Аммо энди биз Поль Погбасиз қолдик, Мактоминей ҳам жароҳат олди ва биз қийин вазиятда қолиб кетдик", – қағуриб гапирганди Сульшер.

Погба нега шошилганини тушуниш мумкин – шу йўл билан у ёзгача барча муаммолардан қутилиб олади ва жисмоний ҳолатини тиклаб, кўпроқ жамоалар қизиқишига сабаб бўлади.

Келажак: Жесси Лингард, Маркус Рэшфорд ва бошқалар

Ҳа, ҳозир Лингард фаолиятининг омадсиз даврини бошдан ўтказмоқда – 2019 йил давомида футболчи АПЛда бирорта голли узатма амалга оширмаганининг ўзи вазиятни қанчалик жиддийлигини намоён қилмоқда. Лекин клубдагилар ҳамон ўз тарбияланувчисига ишонмоқда ва унга имкон беришяпти. 

Шу ўринда, Лингард клуб менежментини энди Райола билан ишлаётгани ҳақида хабардор қилгани ва жамоа футболчини йўқотиши мумкин эканлиги эмас, балки Райола "қизил иблислар" тарбияланувчилари билан жон-жон деб шартнома имзолаётгани ҳавотирлидек.

The Athletic хабар беришича, Райола билан куни-кеча клубнинг бошқа бир тарбияланувчиси Маркус Рэшфорд учрашган. Барчаси кўнгилдагидек ўтганига қарамай, томонлар ҳозирча ҳеч қандай ҳужжат имзолашмаган. Аммо бу келажакда амалга ошмайди дегани ҳам эмас. 

Клубдагилардан ташқари, Райола умуман замонавий футболдаги кўплаб ёш иқтидорлар билан шартнома имзолашни хуш кўради – Холанд, Кейн, Де Лигт, Де Йонг. Райола билан келишмовчилик сабаб "Манчестер Юнайтед" агентнинг бугунги кундаги ва келажакдаги мижозларидан айрилиб қолмаса бўлгани...

Нозима Зарипова таржимаси