"Манчестер Сити"да коронавирусга чалинганлар 7 нафарга етди. "Челси" ва МЮ билан ўйинлар қолдирилиши мумкин

Айни шу сабаб АПЛ 16-тури доирасида "Эвертон"га қарши ўтиши керак бўлган кечаги баҳс қолдирилганди.

Расман! "Эвертон" – "Манчестер Сити" учрашуви қолдирилди

"The Athletic"нинг маълумотига кўра,  якшанба куни "шаҳарликлар"нинг яна 3 нафар футболчисида Covid-19 га топширган тести ижобий чиққан. Клуб жума куни Габриэл Жезус ва Кайл Уокер, бундан ташқари яна икки нафар ходим коронавирус юқтириб олганини эълон қилганди. Барча футболчиларда касаллик асоратларсиз ўтмоқда, клуб уларга машғулот ўтказиш учун индивидуал режа тузиб берган.

Айни пайтга келиб клубда вирус юқтириб олганлар сони 4 кун ичида еттига етди.

Якшанба куни тест топширилган, жавоблари эса душанба куни эрталаб чиққан. Шундан сўнг "Ман Сити" АПЛ ва "Эвертон" вакиллари билан учрашув ўтказди. Якунда вирусни "ирислар" вакилларига ҳам юқтиришнинг олдини олиш мақсадида ўйин қолдирилди.

Агар "Сити" футболчиларидан ёки ходимларидан кимдир ижобий тест топширса, жамоа машғулотларга қайтиш учун руҳсат ололмайди. Бундай ҳолатда АПЛ доирасида "Челси"га қарши тўқнашув (3 январь) ва Лига кубоги ярим финали доирасида МЮга қарши учрашув (6 январь) қолдирилиши мумкин.

Эслатиб ўтамиз, Эмерик Лапорт, Илкай Гюндоган ва Рияд Марез аллақачон коронавирус билан касалланиб бўлишган.