Малайзия, Индонезия, Қозоғистонда ўйнаган ўзбекистонлик ҳужумчи билан суҳбат
15 nov 2019 16:10
News
![](https://championat.asia/upload/storage/529175_original.jpg)
![](/upload/storage/529175_220.jpg)
Малайзия, Индонезия, Қозоғистонда ўйнаган ўзбекистонлик ҳужумчи билан суҳбат
Жорий мавсумда рақиблари дарвозасига жами 19 та гол урган "Оқ-тепа" ҳужумчиси Павел Пуришкин тўпурарлар пойгасида ғолибликни қўлга киритди. Сайтимиз мухбири Павел Пуришкин билан интервью ташкил этди. Қуйида ушбу интервьюнинг тўлиқ матни билан танишишингиз мумкин.
- Аввало сизни А ПРО-Лига тўпурарлари пойгасидаги ғолиблик билан табриклаймиз! Сизнинг фикрингизча ушбу мавсум қандай ўтди?
- Раҳмат табрик учун! Бу албатта фақат ўзимни эмас, балкм жамоамизнинг ютуғи бўлди. Мавсум яхши ўтди деб ўйлайман. Биринчи даврада "Оқ-тепа"да жамоавий ўйинни ташкиллаш юзасидан бир оз қийинчиликларга дуч келдик, шу сабабдан кўрсатган натижаларимиз кўнгилдагидек бўлмади. Барчангизни хабарингиз бор, давралар оралиғида жамоамизда ўзгаришлар бўлди, шундан ўйинимиз ижобий томонга яхшиланди. Мавсумнинг иккинчи қисмида "Оқ-тепа" жамоаси мураббийлари ва футболчилари биргаликда якдиллик билан ҳаракат қилдик, кўриб турганингиздек мавсумни 3-ўрин билан якунладик.
- Павел Пуришкиннинг футболга кириб келиши қандай бўлган?
- Бунинг тарихи жуда узун! Саволингизга фақатгина шуни айта оламанки, кунлардан бир куни ўртоғим менга дўстлари футбол ўйнашни таклиф қилди. Улар билан футбол ўйнадим ва шундан сўнг бу спорт турига меҳрим тушиб қолди, шундае барчаси бошланиб кетди. Аниқ эслайман, ўшанда 8 ёшда эдим.
- Бугунга қадар қайси жамоалар сафида майдонга тушдингиз?
- Дастлаб 8 ёшимда Тошкент шаҳар болалар футбол мусобақасида қатнашдим. Кейинчалик 11 ёш пайтимда Линур Еремеев бошчилигидаги "Пахтакор" болалар жамоаси сафида ўйнадим, ўшанда ҳам мусобақада тўпурар бўлган эдим. 14 ёшга тўлганимда мени "Пахтакор" ёшлар жамоасига таклиф қилишди. Бундан ташқари "Шўртан", "Сўғдиёна", "Динамо" жамоалари сафида ҳам ўйнаганман. Шунингдек Малайзия, Индонезия давлатлари чемпионатларида иштирок этдим. Қозоғистон биринчи лигасида 6 йил ўйнадим. Кейин "Металлург" сафига қўшилдим, орадан бир оз муддат ўтиб яна "Динамо" жамоаси таркибига қўшилдим. Айни дамда "Оқ-тепа" жамоаси сафида футбол учрашувларида иштирок этаяпман.
- Терма жамоамиз ҳақида қандай фикрдасиз?
- Мухлислардан бир оз сабрлироқ бўлишларини сўраган бўлардим, шахсан ўзим Вадим Абрамовга ишонаман, у жуда кучли мураббий. У терма жамоамизни албатта жаҳон чемпионатига олиб чиқади. Буни кўриш учун озроқ кутишимизга тўғри келади.
- Мухлисларингизга тилакларингиз...
- Бутун мавсум давомида мени ва жамоамизни қўллаб-қувватлаб келган барча мухлисларга миннатдорчилик билдираман. Ҳаммангизга раҳмат!
Бекзод Толибов суҳбатлашди
Similar news
![AMP Logo](https://championat.asia/image/logo-amp.png)
Comments