Лушан "Сўғдиёна"га кимларни таклиф қилмоқда?

Бош мураббий Сергей Лушан селекция жараёнида асосий эътиборни ҳозирча ёшларга қаратмоқда. Хусусан, ўтган мавсум "Нефтчи" таркибида харакат қилган жиззахлик иқтидорли ҳужумчи Достон Тошматов "Сўғдиёна" машғулотларида иштирок этмоқда. Таъкидлаш лозимки, 25 ёшли футболчи бугун "Андижон"га қарши кечган назорат учрашувида ўз ҳисобига битта гол ёздириб қўйишга эришди. 

Ундан ташқари ўз вақтида "Пахтакор" сафида келажаги порлоқ ўйинчи сифатида эътироф этилган марказий ярим ҳимоячилар - Жамшид Болтабоев билан Жавоҳир Соҳибов ҳам айни дамда жиззахликларнинг ўқув-йиғин машғулотларида иштирок этмоқда. 

Сергей Иванович ПРО-Лига клубдларидан ҳам бир нечта ўйинчиларни жамоасига таклиф этган. Яъни, "Машъал" ҳимоячиси Искандар Шойқулов, "Сурхон"дан Даниэл Насриддинов ҳамда "Нурафшон"дан Мурод Ражабов ҳозирда "Сўғдиёна"да қолиш учун астойдил тер тўкмоқда. 

Яна шуни ҳам айтиш лозимки, ўтган мавсумнинг биринчи қисми якунига етгач, жамоа билан хайрлашган иқтидорли дарвозабон Дилшод Ҳамроев яна "Сўғдиёна" сафига келиб қўшилган.