"Локомотив": "Пахтакор" ёшлари билан ўйинда мағлубият
06 feb 2016 18:03
News

"Локомотив": "Пахтакор" ёшлари билан ўйинда мағлубият

“Чилонзор” даҳасидаги сунъий қопламали майдонда “Локомотив” ёшлар жамоаси “Пахтакор”нинг 1-лига жамоасига қарши ўйинда майдонга тушди.

Беллашувда Жасур Абдураимов шогирдлари 3:0 ҳисобида муваффақият қозонишди.

Сир эмаски, январь-февраль ойларида бир қатор янги футболчилар мураббийлар кўригида бўлишади. Бугунги ўйин “Локомотив” учун уларни синовдан ўтказиб олиш учун ҳам керак эди. Футболчиларни рўйхатдан ўтказиш вақти яқинлашгани сайин мураббийлар якуний таркиб аъзоларини аниқлаб бораверишади.

Ўйиннинг 34-дақиқасига келиб “пахтакор”чилар ҳисобда олдинга чиқиб олишди. Биринчи бўлимда устунлик асосан майдон эгалари томонида эди. Иккинчи бўлимга келиб мураббийлар таркибни бутунлай янгилашди. Бунинг натижасида устунлик “Локомотив” футболчилари томонига ўтди. Ҳужумлар асосан “Пахтакор” дарвозаси олдида ташкил этилганига қарамай, кейинги голлар ҳам мезбонлар томонидан киритилди. Ҳар икки сафар ҳимоячилар қарши ҳужумни қўйиб юборишди.

Бугунги беллашув йиғинда иштирок этаётган бир қатор йигитларнинг келгуси тақдирларига ойдинлик киритиб бериши мумкин. Улар намойиш этган ўйинни мутахассислар синчковлик билан кузатиб боришди.

ПАХТАКОР – ЛОКОМОТИВ 3:0

Голлар: 34 (1:0). 50 (2:0). 66 (3:0).

1-бўлим: Нортожиев — Адамов, Эркинов, Ғаниев, Шаҳобиддинов — Қаюмов, Фозилов, Омоналиев, Илёсов — Ғуломов, Соқиев.

2-бўлим: Нортожиев — Абдуллаев, Муҳамедов, Иброҳимов, Эргашев — Хамроев, Сафаров, Эргашев, Танаев — Мўминқулов, Камолов.