Лига "Локомотив" стадионидаги қурилиш ишлари билан танишди

Лига вакиллари "Локомотив" стадионида бўлиб, у ердаги қурилиш ишлари билан танишди. Айни дамда клуб ўз уй стадионини кейинги мавсумга тайёрлаш мақсадида катта ҳажмдаги ишларни амалга оширмоқда. Жумладан, "Локомотив" стадиони майдонининг чими, дренаж қисми тўлиқ янгиланмоқда. Бундан ташқари, стадион прожекторини амалдаги талабларга мос равишда тўлиқ янгилаш режалаштирилмоқда. Мажмуанинг қолган қисмлари ҳам тўлиқ таъмирланади.

'"Локомотив" клуби асосий стадион таъмири билан чекланиб қолаётгани йўқ. Клуб ўз аренаси ёнгинасидаги 2-сонли спорт мактаб ҳудудида, муассаса билан келишган ҳолда табиий, замонавий дренаж тизимига эга машғулот майдони қуришни бошлаб юборган. Келишувга кўра клуб спорт мактаби тарбияланувчилари учун алоҳида сунъий майдон қуриб беради. Болалар учун мўлжалланган майдон қурилишининг асосий қисми ўз ниҳоясига етиб улгурган.

Маълумки, "Локомотив" клубининг қароргоҳи асосий стадион ёнида жойлашган. Клуб энди шу ҳуддудда машғулот майдони ҳам барпо этмоқда. Қурилиш ишлари якунига етгач, "Локомотив" клубининг қароргоҳи, машғулот майдони ва уй учрашувларини ўрказадиган стадиони бир ҳуддудда жойлашади. Бу эса ўз навбатида футболчилар учун қулайлик яратади.

Клуб ёшлар жамоаларини ривожлантириш бўйича бошқа режаларини ҳам Лига билан баҳам кўрди. Лига бир тизим бўлиб ишлайдиган ва узоқ муддатли режалар асосида ҳаракат қиладиган клубларни доим олқишлайди.