Легионер мураббий, "Насаф" посбони ва "Металлург" ҳимоячиси — Суперлигада 15-турнинг энг яхшилари

Championat.asia сайти талқинига кўра 15-турнинг энг яхши дарвозабони – Абдувоҳид Неъматов ("Насаф")

"Насаф" бу тур ўз майдонида "Пахтакор" билан ўйнади. Учрашув давомида "шерлар" кўплаб ҳужумлар ташкил этишди, бироқ "аждарлар" посбони Абдувоҳид Неъматов жамоасини муқаррар голлардан қутқариб қолди. Шу тариқа Неъматов турнинг энг яхши посбони сифатида эътироф этилди.

Championat.asia сайти талқинига кўра 15-турнинг энг яхши мураббийи – Виталий Левченко ("Нефтчи")

"Нефтчи" Фарғонада "Динамо"ни қабул қилди ва 3:2 ҳисобида ғалабага эришди. Эътиборлиси ўйин бошида "Нефтчи" 10 киши бўлиб қолди ва бутун ўйин давомида камчилик бўлиб ўйнади. Виталий Левченко бошчилигидаги фарғоналиклар ирода намойиш этишди ва ғалаба қозонишди. Шу тариқа "Нефтчи" устози турнинг энг яхши мураббийи деб топилди.  

Championat.asia сайти талқинига кўра 15-турнинг энг яхши футболчиси – Азизбек Пирмуҳаммадов ("Металлург")

"Металлург" бу тур Жиззахда "Сўғдиёна" меҳмони бўлди ва 2:2 ҳисобида дуранг ўйнади. Шу куни чап қанот ҳимоясида ўйнаган Азизбек Пирмуҳаммадов жуда фаол бўлди ва гол уришдан ташқари голли узатмани ҳам амалга оширди. Пирмуҳаммадов сайтимиз талқинига кўра 15-турнинг энг яхши футболчиси деб топилди.  

Championat.asia сайти талқинига кўра 15-турнинг энг чиройли голи муаллифи – Музаффар Олимжонов ("Бунёдкор")

"Бунёдкор" - "Андижон" учрашувининг 47-дақиқасида Темурхўжа Абдухолиқовнинг ажойиб узатмасидан кейин Музаффар Олимжонов ҳимоячисини ортда қолдириб чиройли гол урди. Айнан Олимжонов томонидан урилган гол championat.asia сайти талқинига кўра турнинг энг чиройли голи деб топилди.