Кўп нарсани ҳал қиладиган ОФК йиғилиши (1-қисм)

Улардан энг муҳими сифатида ОЧЛ ва ОФК Кубоги учун мамлакатларга ажратиладиган ўринлар, 2016 йил ўтказиладиган 22 ёшгача футболчилардан иборат терма жамоалар учун Осиё чемпионати ва футзал бўйича қитъа чемпионати мезбони аниқланишини келтириш мумкин. Шунингдек, Осиёнинг энг яхши футболчисини аниқлаш ҳам ноябрь охирига белгиланган.

Йиғилишда ОФК ОЧЛ ҳамда ОФК Кубоги учун квоталар расман маълум қилинади. Чемпионлар лигасида иштирок этиш учун ўша мамлакат рейтингда кучли 24таликдан ўрин олиши ва ўз минтақасида кучли 12 давлатдан бири бўлиши лозим. Шу билан бирга ОФК томонидан қўйилган 6  талабга жавоб бериши шарт. Техник стандарт (ОФК рейтинг баллари), клуб лицензия тизими, спорт ҳалоллиги, ПФЛ ташкилотчилиги, стадионлар ва логистика, виза, шароитлар ҳисобга олинади.

Ҳозирги ҳолатда ОФК рейтинги қуйидаги кўринишда ҳисобланмоқда:
рейтингни ҳисоблашда 70 фоиз клублар ва 30 фоиз миллий терма жамоа натижалари ҳисобланади, охирги 4 йилликдаги натижалар амалда бўлади. Унда ғалабага 3, дурангга 1 ва кейинги босқичга ўтилгани учун 3 очкодан берилади. Лекин ОФК Кубоги ва ОЧЛда қўлга киритилган очколар турлича бўлади. ОФК Кубогида қўлга киритилган ҳар бир очко ОЧЛнинг учдан бири сифатида ҳисоблаб қўшилади. Бу ОЧЛда 1 очко ОФК Кубогидаги 3 очко билан тенг деганидир. Клублар мусобақаларида биттадан кўп клуб иштирок этганда умумий очколар қатнашчилар сонига бўлиб юборилади. Биринчи ўриндаги ассоциация 100 очко олади ва бошқалар ўрнига қараб пропорционал равишда камайган очколарга эга бўлишади.

ОЧЛда ОФКнинг ушбу рейтингида дастлабки 24 поғонасидан ўрин эгаллаган мамлакат клублари иштирок этишлари мумкин. Албатта, бунда жамоалар лицензиядан ўтган бўлишлари, етарли шароитларга эга бўлиши белгилаб қўйилган. ОЧЛга саралаш босқичи 3 даврадан иборат бўлади ва ўйинлар фақат бир майдонда бўлиб ўтади. Рейтингда 7-12 ўриндаги давлатлар жамоалари ОЧЛ саралашида мағлубиятга учраса, улар ОФК Кубоги гуруҳ баҳсларида ўйнашади. Агар бу давлатлар жамоалари ОЧЛ гуруҳ босқичига йўлланма олса, унда чемпионатда кейинги ўринни эгаллаган клубга ОФК Кубоги гуруҳ босқичида иштирок этишга имконият берилади. ОЧЛда гуруҳ баҳсларидан кейин нимчорак, чорак, ярим финал ва финал икки ўйиндан иборат бўлиши сақлаб қолинади.

Рейтингда 25-32 ўриндаги ассоциациялар жамоалари ОФК Кубоги гуруҳ босқичи, 33-47 поғонадаги давлатлар клублари эса ОФК Кубоги плей-офф баҳсларида қатнашади. 2014 йилдаги ўринлар тақсимоти 2015-2016, 2016 йилдаги тақсимот эса 2017-2020 йиллар учун амал қилиниши ҳақида айтилганди. Бироқ бу ҳар бир йил охиридги йиғилишда ўзгариб кетиши ҳам мумкин.

ОФК Кубогида иштирок этувчи давлатлар камида битта “А” тоифадаги стадионга эга бўлишлари лозим. ОФК Кубогида ҳам саралаш раунди 3тадан иборат бўлади. Нимчорак, чорак ва ярим финаллар 2тадан майдонда ўтказилади. Финал эса финалчилардан бирининг майдонида бўлиб ўтади.

Ушбу йил ОЧЛ учун ўринлар тақсимотида Ироқ билан муаммо юзага келмоқда. Ироқ клублари  лицензиялашдан ўтмагани сабабли бу мамлакатнинг 1+1 ўрни бошқа давлатларга бўлиб берилиш эҳтимоли мавжуд. Бундай ҳолатда рейтингда юқорироқ бўлган Ўзбекистон ва БААда ушбу квоталарга эга бўлиш имконияти пайдо бўлади. Шунда биз 3+1 ўрнига эга бўламиз. Саудия Арабистони ва Эрон эса максимал ўринларга эга. Агар ОФК регламентга амал қилиб, лицензиядан ўтмаган давлатни ОЧЛга қўймаса, ундай ҳолда Ўзбекистон, БАА ва Қатарда ўринларни кўпроқ олиш имконияти бор. Бироқ ҳаммасини 29 ноябрда ўтадиган йиғилиш аниқлаб беради.

ОФК томонидан эълон қилинган якуний рейтинг шундай кўриниш олган:

1. Жанубий Корея	68,294	26,571	94,866
2. Саудия Арабистони	70,000	18,268	88,268
3. Эрон	50,794	30,000	80,794
4. Япония	47,161	29,946	77,107
5. Ўзбекистон	35,593	26,679	62,272
6. Австралия	38,708	19,232	57,940
7. БАА	35,667	22,125	57,792
8. Хитой	37,892	19,768	57,660
9. Қатар	36,335	19,768	56,103
10. Ироқ	26,052	21,054	47,106
11. Қувайт	31,441	13,982	45,423
12. Иордания	21,059	23,250	44,309
13. Таиланд	27,585	5,464	33,049
14.Уммон	9,640	20,946	30,586
15.Вьетнам	16,610	11,143	27,753
16. Баҳрайн	9,047	16,500	25,547
18. Индонезия	18,093	6,911	25,004
17. Ливан	11,864	13,179	25,043
19. Сурия	14,633	8,250	22,883
20. Гонконг	14,237	5,839	20,077
21. Мьянмар	7,860	11,089	18,949
22. Малайзия	10,975	7,179	18,153
23. Ҳиндистон	10,381	6,375	16,756
24. Сингапур	9,936	6,161	16,097
26.Мальдив	6,081	9,804	15,884
25. Фаластин	0,000	15.911	15,911
27. Филиппин	0,000	12,268	12,268
28. Тожикистон	0,297	11,464	11,761
29. Афғонистон	0,000	11,464	11,464
30. Туркманистон	0,000	10,554	10,554
31. КХДР	0,000	9,000	9,000
32. Қирғизистон	0,297	8,464	8,761
33. Лаос	0,000	7,554	7,554
34. Гуам	0,000	5,946	5,946
35. Яман	1,928	3,321	5,249
36. Шри Ланка	0,000	4,071	4,071
37. Бангладеш	0,000	3,643	3,643
38. Непал	0,000	3,268	3,268
39. Покистон	0,000	2,732	2,732
39. Тимор Лесте	0,000	2,732	2,732
41. Макау	0.000	2,625	2,625
42. Камбоджа	0,000	2,464	2,464
43. Хитой Тайпейи	0,000	2,089	2,089
44. Мўғулистон	0,000	1,554	1,554
45. Бруней	0,000	0,804	0,804
46. Бутан	0,000	.	.

Изоҳ: 1-устун мамлакат, 2-устун клублар баллари, 3-устун миллий терма жамоа баллари, 4-устун умумий балл.


Минтақалар бўйича клублар мусобақаларига тақсимот қуйидагича кўринишда бўлади. Умумий жадвалдан ҳар бир минтақанинг ўринга мос келувчини давлатини жойлаштирган ҳолда ўзингиз ҳам квоталар ҳақида хулоса чиқариш имкониятига эгасиз. Биз сизларга қулай бўлиши учун уни очиқ жадвал кўринишида (қўлланма сифатида) ҳавола этамиз:

Масалан, Ўзбекистон ўз минтақасида Саудия Арабистони ва Эрондан кейинги учинчи ўринни эгаллаб турибди.
 

Рейтинг	ОЧЛ гуруҳ	ОЧЛ плей-офф	ОФК гуруҳ	ОФК плей-офф	ОФК саралаш
1	3	1
2	3	1
3	2	2
4	2	2
5	1	2
6	1	1
7		1	1
8		1	1
9		1	0	1
10		1	0	1
11		1	0	1
12		1	0	1
13			1	1
14			1	1
15			1	1
16			1	1
17				1	1
18				1	1
19				1	1
20				1	1
21				1	1
22				1	1
23				1	1
Умумий	12	9+6	6	15	7

 
Биз учун яна 22 ёшгача бўлган футболчилардан иборат терма жамоаларнинг Осиё чемпионати мезбони номи аниқланиши ҳам катта аҳамиятга эга.

Давоми бор...

Беҳзод НАЗАРОВ.