Конфедерациялар кубоги-2017. Бугун қуръа ташланади

Қуръа ташлаш маросимида қуйидаги 8та терма жамоа иккита гуруҳга ажратилади:

Россия, Германия, Португалия, Австралия, Чили, Мексика, Янги Зеландия ва 2017 йилги Африка миллатлар кубоги соҳиби.

Қуръа ташлаш маросимида 2005 ва 2009 йилги Конфедарациялар кубоги ғолиби бразилиялик машҳур футболчи Жулио Баптиста, енгил атлетика бўйича россиялик Олимпиада чемпиони Елена Исинбаева ҳамда беш карра Россия чемпиони Сергей Семак иштирок этишади.

Қозондаги маросимга қуйидаги мураббийлар ташриф буюришади: Анге Постекоглу (Австралия), Хуан Антонио Пицци (Чили), Йоахим Лев (Германия), Хуан Карлос Осорио (Мексика), Энтони Хадсон (Янги Зеландия), Фернанду Сантуш (Португалия) ва Станислав Черчесов (Россия).

Қуръа ташлаш маросими Қозон вақти билан соат 18:00да (Тошкент вақти 20:00) бошланади ва 40 дақиқа давом этади. Тадбир бошловчилари Яна Чурикова ҳамда Андрей Малахов бўлишади. Қуръа жараёнини ФИФА бош котиби ўринбосари Звонимир Бобан ҳамда ФИФА мусобақалар ўтказиш департаменти директори Колин Смит ўтказишади.

Қуръа ташлаш маросимини 249 нафар журналист Қозон Теннис академиясидан туриб ёритиб боришади. Улардан 154 нафари халқаро ОАВ вакиллари ҳисобланади. Маросимни дунёнинг 150дан ортиқ мамлакати томоша қилади. Тадбирни ФИФАнинг youtube.com сайтидаги расмий канали орқали тўғридан-тўғри томоша қилиш мумкин.

2017 йилги FIFA Конфедерациялар кубоги 16 кун давом этади ва 16та ўйиндан иборат бўлади. Очилиш учрашуви 17 июнда бўлса 2 июль куни чемпион номи маълум бўлади.