Клаудио Браво:«Барчаси ҳали олдинда»

Ана шу ўйин олдидан чилилик дарвозабон Каталониянинг Mundo Deportivo нашрига интервью берди.

- «Камп Ноу»га қайтаётганингиз ҳақида қандай фикрдасиз?

- Хотиржамман. Аммо мазкур ўйиннинг жамоамиз учун ўта муҳимлигини ҳам яхши тушунаман. Бу стадионга қайтаётганимдан хурсандман. Чунки фаолиятимнинг энг ёрқин дамларини айнан шу ерда ўтказдим. Ушбу клуб туфайли жаҳон футболи элитасига кирдим.

- Яхши қабул қилишларини кутяпсизми?

- Ишончим комил, мухлислар илиқ қарши олишади. «Барселона»ни ажойиб тарзда тарк этдим. Бу клубда ўйнаб, барча совринларни қўлга киритдим. Лекин «Манчестер Сити»га ўтганимдан афсусда эмасман.

- Сизнингча, ким ғолиб бўлади?

- Менимча, жамоалар ўз ўйинларини намойиш қилишади. «Барселона»га деворлари ёрдам бериши мумкин. Бироқ биз ўзимизнинг кучли тарафларимизни намойиш этиб, режани бажаришимиз керак. ғалаба учун ҳар икки клубнинг имкониятлари бир хил.

- Месси, Суарес ва Неймар билан яна бирга майдонга тушасиз. Фарқи - бу сафар улар сизнинг дарвозангизга таҳдид солишади...

- Улар билан бир клубда ўйнаганим - омадим. Жамоаларимизнинг ўйин услуби ўхшаб кетади. Бироқ «Барселона» таркибида Месси бор. Леонинг ўйинини қанчалик таҳлил қилманг, ундан нима кутишингизни билмайсиз.

- Марк-Андре тер Штегенни «Сельта»га қарши учрашувдаги ҳаракати учун танқид остига олишди. Унинг ўйинига қандай баҳо берасиз?

- Ҳар қандай дарвозабон танқид қилинади. Айниқса, гап «Барселона» ҳақида кетганда. Нима бўлган тақдирда ҳам, тер Штеген - кучли дарвозабон. Ишончим комил, у босимларга бардош беради.

- Дарвозабонлар учун хатоларни унутиш қийинми?

- Ушбу позицияда ўйнаганлар бу саволга қандай жавоб беришни яхши билишади. Ўйлашимча, дарвозабон ҳар қандай жамоада муҳим ўйинчи ҳисобланади. Босимга бардош бериш учун эса яхши ўйнаш керак.

- Ўзингизга нисбатан ишлатилган танқидларга қандай муносабатда бўласиз?

... интервьюнинг қолган қисмини "ИнтерФутбол" сайтида ўқиш мумкин.