Кичик Пеледан Марадона Жуниоргача: яшил майдонда омади чопмаган фарзандлар

Баъзан машҳур футболчиларнинг фарзандлари оммавий эътибор марказида улғайган бўлса-да, улуғвор номга муносиб даражада муваффақиятга эриша олмайди. Улар болаликданоқ истеъдодларини эмас, балки оталарининг меросини доимий равишда исботлашга мажбур бўладилар. Агар майдонда яхши ўйин намойиш этишса – мақтовлар ёғдиради, акс ҳолда танқидларга дуч келишади. Кўпинча "Отангдек бўла олмайсан" деган мулоҳазалар уларни фаолият йўлини қайта кўриб чиқишга мажбур этади.

Шу боис, баъзи ёшлар таниқли фамилия орқали келган масъулиятдан қочиш мақсадида ўзларига янгича, балки жамоатчилик диққатидан анча узоқ соҳаларда имконият излашни маъқул кўрадилар.

Футбол бутсасини михга илган сўнгги машҳур фамилия эгаси – Кристиан Тотти бўлди. У йигирма ёшига етмасдан футболчиликни тарк этиб, мураббийлик фаолиятини бошлашга қарор қилди. Кристианга Тотти фамилияси мартаба эмас, балки елкадаги оғир юк бўлиб қолди.

Бундай тақдирлар футбол тарихида кам эмас. Энцо Зидан, Кристиано Мальдини, Диего Армандо Марадона Жуниор каби машҳур футболчиларнинг фарзандлари ҳам ўз йўлларини излар экан, доимий таққослар, умидлар ва босимлар остида яшашга мажбур бўлишди. Эндиликда Франческо Тоттининг ўғли Кристиан ҳам ана шу рўйхатга қўшилди.

Кристиан Тотти

Кристиан Тотти футболчилик фаолиятини "Рома" академиясида бошлаган ва кейинчалик жамоанинг 18 ёшгача бўлган ёшлар таркибига кўтарилган. Сўнгги икки йил ичида у Италия ва Испания клублари – "Фрозиноне", "Райо Вальекано", "Авеццано" ҳамда "Ольбия" жамоалари сафида тўп сурди. Бироқ кейин футболдаги йўлини тугатиш ва янги ҳаётга қадам қўйиш ҳақида қарор қабул қилди.

Ҳозирги кунда у Римда жойлашган Тотти футбол мактабида техник ходим сифатида фаолият юритмоқда. Кристиани келажакдаги мақсади аниқ – у мураббийликка интилаётган ёш мутахассислардан бири.

Шуни таъкидлаш жоизки, у ҳали йигирма ёшда. Бу эса унинг янги йўлда ўзини намоён этиши, қайта туғилиш ва ривожланиш учун етарлича вақт ва имкониятга эга эканлигини англатади.

Энцо Зидан

Зинедин Зидан ўғлига Энцо исмини Уругвай афсонаси – Энцо Франческоли шарафига қўйган. Бироқ болаликданоқ у ўзини отасининг катта номидан узоқроқ тутишга интилиб, мактабда ҳам, "Реал Мадрид" ёшлар жамоасида ҳам онасининг фамилияси – Фернандес билан танилишни маъқул кўрди. Ахир, фамилиянгиз Зидан бўлса ва сизнинг позициянгиз ҳужум ортидаги ўйин бўлса, сиздан ғайриоддий маҳорат ва натижалар кутилади.

Энцо, ўзи истагани каби, шунчаки Энцо ёки Фернандес бўлиб қолишни хоҳлади. Аммо футболчи сифатидаги фаолияти, катта умидларга қарамай, мураккаб йўлни босиб ўтди. 29 ёшида "Реал Мадрид" асосий жамоасида дебют қилганидан сўнг Европанинг турли мамлакатларида самарасиз карьера билан чекланди ва кейин футболдан воз кечди.

Фаолиятини якунлар экан, у шундай дея таъкидлаган эди: "Мен йиллар давомида миш-мишлар, ғийбатлар ва ноҳақ гап-сўзлар билан курашдим. Одамлар сизнинг ҳаракатингизга эмас, фамилиянгизга қараб баҳолайди. Улар сенга ишонмайди, сени кимнингдир ёрдами билан келган деб ўйлашади".

Шунингдек, у "Реал Мадрид"даги дебютини унутилмас тарзда бошлаган эди – отаси Зинедин Зидан бош мураббийлик қилаётган пайтда ўйинда майдонга тушиб, гол киритган. Эртага куннинг барча газеталари "Бернабеу"да яна бир Зидан" сарлавҳаси билан чиқди. Бироқ ҳеч ким ўшанда – бу ёрқин дебют унинг "Реал" либосидаги ягона ўйини ва карьерасининг энг юқори нуқтаси, айни пайтда эса пасайишнинг бошланиши бўлиб қолишини тахмин қилмаганди.

Кристиан Мальдини

1996 йилда туғилган футболчи Кристиан Малдини 27 ёшида профессионал футболчилик фаолиятини якунлашга қарор қилди. Унинг футболдаги сўнгги йиллари Италия С Сериясидаги "Лекко" жамоасида ўтди, ундан аввал эса "Про Сесто" сафида тўп сурган.

Отаси – италиялик афсонавий ҳимоячи Паоло Малдини сингари, Кристиан ҳам марказий ва қанот ҳимоячиси позицияларида ҳаракат қилган. Бироқ футболдаги фаолиятини нисбатан эрта тугатиб, у янги йўналишни танлади: агентлик соҳаси.

Айни пайтда Кристиан Малдини машҳур агент Жузеппе Ризо билан ҳамкорликда иш олиб бориб, футболчиларни танлаш ва уларнинг карьерасини бошқаришда фаол иштирок этмоқда.

Эдиньо

У умри давомида бир оғир масъулият – Пеледан кейинги "Пеле" бўлиш юки билан яшашга мажбур бўлди. Афсонавий футболчи Пеленинг тўнғич фарзанди бўлган Эдиньо футбол фаолиятини бошлар экан, отасидан фарқли равишда дарвозабон позициясини танлади. Бироқ унинг спортдаги йўли узоқ давом этмади ва профессионал карьерасининг якунланиши билан шахсий ҳаётида жиддий қийинчиликлар бошланди.

Карьерадан кейин у жиноий муҳит таъсирига тушиб қолди ва бу вазиятдан чиқиб кета олмади. 2005 йилда Сан-Паулу шаҳрида халқаро гиёҳванд моддалар савдосида иштирок этганлик айблови билан ҳибсга олинди. Бир неча йиллик қамоқ жазосидан сўнг озодликка чиқди, аммо 2014 йилда яна ўша йўлга қайтди – гиёҳванд моддалар савдоси ва пул ювишда айбланиб, 33 йил озодликдан маҳрум этилди. Кейинчалик ушбу жазо муддати 12 йилга қисқартирилди.

Андреа Манчини

Ёшлик йилларида дунёнинг ярмида тажриба орттирган Андреа Манчини футболчи сифатидаги сафарини етарли, деб ҳисоблади ва янги йўлни танлади. Унинг профессионал фаолияти "Интер" клуби ёшлар жамоасида бошланган бўлиб, кейинчалик "Монца", "Болонья" ҳамда Англиянинг "Манчестер Сити" клубларида давом этди. Шундан сўнг Нидерландия, Испания, Венгрия ва Америка Қўшма Штатларида футболчилик фаолиятини давом эттирди.

Халқаро майдонда орттирилган бой тажриба, турли чемпионатлар ва жамоалар ҳақида чуқур билим Манчинини футболда бошқа мақсад сари йўллашга ундади. У ўз олдига аниқ мақсад қўйди: иқтидорли ёш футболчиларни излаб топиш ва уларни катта футболга олиб чиқиш. Бугунги кунда Андреа Манчини "Сампдория" клубида спорт директори сифатида фаолият олиб бормоқда.

У илгари "Барселона" клубида Деку билан ҳамкорлик қилган, Италиядаги кўплаб футболчилар билан самарали алоқалар ўрнатган. Ҳозирда эса у отаси – Роберто Манчини футболчилик фаолиятида барча ютуқларга эришган "Женоа"га қайтди.

Диего Армандо Марадона Жуниор

Неапольда Марадона исми ва фамилияси шунчалик масъулиятли ва таъсирлики, гўё елкага юк бўлиб тушади — худди харсангтошдек. Фақатгина афсонавий футболчи Диего Армандо Марадонанинг тўнғич фарзанди бўлиш эмас, балки унинг номини олиб юришнинг ўзи ҳам катта босимни талаб қилади.

Диего Армандо Марадона кичик профессионал футболда юқори натижаларга эриша олмади. Кейинчалик у бу ҳақда "La Gazzetta dello Sport" нашрига берган интервьюсида шундай дейди: "Мен бундай босимни кўтара олмадим."

Шу билан бирга, у спорт соҳасида фаолиятни тўхтатмади. Италия пляж футболи миллий терма жамоаси сафида Европа ва жаҳон чемпионатларида иштирок этиб, ўзини бошқа йўналишда намоён қилди. Айни пайтда эса у Испаниянинг бешинчи дивизиясида жойлашган "Ибарра" жамоасида мураббий сифатида иш олиб бормоқда.

Жорж Веа Жуниор

Агар бир Веа футбол тарихида буюк чемпион сифатида танилган бўлса, яна бири, яъни иккинчи фарзанд – бугунги кунда А Сериянинг етакчи жамоаларидан бири "Ювентус" сафида тўп тепмоқда, учинчи фарзанд эса ҳаётнинг бошқа бурилишларида қолиб кетди.

Кичик Жорж Веа Миланда улғайган, бир пайтлар катта умидлар билан қаралган эди. Аммо шон-шуҳрат излаб турли мамлакатларда ўз йўлини топишга уринган бу йигит кутилган натижаларга эриша олмади. 2014 йил май ойида у "Пари Сен-Жермен" клубининг захира жамоаси таркибида Championnat de France Amateur'да дебют қилган бўлса-да, бу унинг футболдаги ягона жиддий чиқиши бўлиб қолди.

У майдонда эмас, балки унинг ташқарисидаги ҳаракатлари билан омма эътиборига туша бошлади. 2021 йилда Парижда белгиланган комендантлик соатига риоя қилмасдан, шовқинли уй зиёфати уюштиргани учун ҳибсга олинди. Бу воқеа отаси, Либерия президенти Жорж Веа ва Франция расмийлари ўртасида кичик дипломатик муаммога сабаб бўлди.

Оқил Абдубарноев тайёрлади.