KFC ишчиси етти йилда А Серия тўпурарларидан бирига айланди

"Championat.asia"да ишлашимни билган аксар танишларим, футболга маълум даражада мухлислик қиладиган инсонлар, "футболчиларнинг ҳаёти зўр-а, уларга маззада", деганини кўп эшитаман. 

Бироқ натижага эришиш учун тинмай меҳнат қилиш талаб этилади. Сиз белгилаган марра қанчалик баланд бўлса, шунчалик кўпроқ тер тўкишингиз зарур бўлади.  

У ёки бу футболчи юлдуз даражасига чиққач, биз унинг бугунги кунига кўпроқ эътибор берамиз. Босиб ўтилган йўл эса кўпинча эътибордан четда қолиб кетади. Бироқ футбол оламида шундай воқеалар борки, эшитиб, ўқиб лол қоласиз. 

Бугун KFC"да ишлаётган бирор ёш танишингиз орадан 7 йил ўтиб, А Серияда тўп тепади, ўйнаганда ҳам яхшигина тўпурар бўлади десак, ишонасизми? Қийин-а? Бироқ португалиялик Бетункал Бето айнан шу йўлни босиб ўтган. Катта футболга ўтиш даври жуда муҳим бўлгани сабабли ушбу мақола таржимасини эътиборингизга тақдим этишга қарор қилдик.  

Аввалги турлардан бирида "Лацио" дарвозаси томон ошиқаётган "Удинезе" ҳужумчиси Бету 33 км/с тезлик олди. "Бор йўғи шунчами? Мен жуда секин югураётган эканман-да", – деб хазиллашди ўйиндан кейин футболчи. 

33,32 км/с – А Серияда мавсумнинг саккизинчи (бу борада етакчи Думфрис - 35,02) ва марказий ҳужумчилар ўртасида биринчи кўрсаткич. Шу ўринда Бетунинг бўйи 196 см ва оғирлиги 88 кг эканлигини инобатга олсак, чиндан ажойиб кўрсаткич.

"Удинезе" 23 ёшли "гигантни" Португалиянинг "Портимоненше"сидан олиб келди. Ўтган мавсум Бету Европа Бразилиясида 30та ўйинда майдонга тушди ва 11 та гол уришга муваффақ бўлди. Италияда спортчи унданда самаралироқ ҳаракат қилмоқда – 15 ўйинда 7та гол, кечаси у "Милан" дарвозасини ишғол қилди ва чемпионлик курашидаги Пиоли шогирдлари очко йўқотишига сабабчи бўлди.

Бетунинг ҳаётидаги жиддий бурилиш нуқтаси Бенфика футбол мактабидан хайдалиши бўлган. Ўшанда қахрамонимиз 16 ёшда эди ва мамлакатнинг энг номдор жамоаларидан бири бўйдор ўсмирдан воз кечади. Бету бир йил давомида KFC"да ишлайди, соҳил (пляж)да дўстлари билан футбол ўйнар ва профессионал футбол ҳақидаги орзулари билан хайрлашишга тайёр эди. Аммо шу вақтда унинг фикрини ўзгартирадиган инсон топилади. Бетунинг аввалги клуби президенти йигитчани қайтишга кўндиради, тунни клубларда ўтказишни унутиш ва ҳаёт тарзини ўзгартиришга, тўғри овқатланишига ва футболга бор эътиборини қаратишга мажбур қилади.

Астойдил меҳнат самараси ўлароқ, орадан етти йил ўтиб, Бету Италия чемпионатида голлар урмоқда, уларни худди ЛеБрондек нишонлаяпти ва топ клублар эътиборига тушиб улгурди. Айтишларича, ҳужумчи ўйинларини "Интер" ва "Аталанта" жиддий тарзда кузатиб бормоқда. Шундай экан, яқин вақтлар ичида ушбу футболчини бирор топ клубда кўриб қолсангиз, хайрон бўлманг.

Нозима Зарипова таржимаси